Qarýly kúshter ulttyq Aitu messendjerine kóship jatyr
ASTANA. KAZINFORM – Qazaqstanda aqparattyq qaýipsizdikti nyǵaıtý baǵytyndaǵy jumys jalǵasyp jatyr. Osy strategııa aıasynda eldiń Qarýly kúshteri qyzmettik málimetterdi jiberý úshin otandyq Aitu messendjerine kezeń-kezeńmen kóshýdi bastaıdy.
Memleket basshysynyń tapsyrmasymen qabyldanǵan bul sheshim sheteldik platformalardy paıdalanǵan kezdegi táýekelderdi azaıtýǵa baǵyttalǵan.
Otandyq messendjerge kóshý — memlekettik qurylymdarda, onyń ishinde qorǵanys salasynda da qyzmettik aqparatty qorǵaý deńgeıin arttyrý boıynsha negizgi qadamdardyń biri. Buǵan deıin derekterdi jiberý úshin kóbinese sheteldik messendjerler qoldanylyp kelgen. Bul óz kezeginde qaýipsizdikke belgili bir qater tóndirýi múmkin edi. Qazaqstan ıýrısdıktsııasynda ornalasqan jáne derekterdi saqtaý men óńdeý talaptaryna tolyq saı keletin Aitu messendjerin paıdalaný aqparat aǵynyn tolyq baqylaýǵa múmkindik beredi.
Qorǵanys mınıstri avıatsııa general-leıtenanty Daýren Kosanov Qarýly kúshteriniń barlyq bólimshesin Aitu messendjerine kezeń-kezeńmen kóshirýdi tapsyrdy.
Kóshý protsesi 2025 jyldyń sońyna deıin aıaqtalady. Bul rette armııanyń uıymdyq-shtattyq qurylymy men qoldanystaǵy baılanys arnalary eskeriledi. Mundaı tásil qyzmettik protsesti buzbaı, júıeli ári birtindep ıntegratsııany qamtamasyz etedi.
— Ulttyq IT-ónimderdi qoldaný — tsıfrlyq keńistiktegi derbestikti qorǵaýǵa baǵyttalǵan jahandyq úrdis. Qarýly kúshterdiń Aitu messendjerine kóshýi qyzmettik derekterdiń syrtqa taralýyn boldyrmaı, qyzmettik maqsattaǵy aqparatty tıisti deńgeıde qorǵaýǵa múmkindik beredi, — dep atap ótti Qorǵanys mınıstriniń tsıfrlandyrý jónindegi orynbasary Darhan Ahmedıev.
Jańa messendjer keń aýqymdy mindetterdi sheshý úshin qoldanylatyn bolady. Onyń ishinde jedel aqparat almasýdan bastap, jınalystar ótkizý men is-qımyldardy úılestirý sharalary da bar. Bul qaýipsizdik deńgeıin arttyryp qana qoımaı, ishki kommýnıkatsııany da ońtaılandyrýǵa múmkindik beredi.
Aıta ketelik Qorǵanys mınıstrligi jasandy ıntellektti engizý jónindegi mamandandyrylǵan bólimshe qurǵan edi.