Qarýly kúshter tarıhynda tuńǵysh ret kıberqaýipsizdik ofıtserleri túlep ushty
ASTANA. KAZINFORM — «Kıberqaýipsizdik» mamandyǵy boıynsha zapastaǵy ofıtserlerdiń alǵashqy legi oqýdy aıaqtady, dep habarlaıdy QR Qorǵanys mınıstrliginiń baspasóz qyzmeti.
QR Qarýly kúshteri tarıhynda alǵash ret «Kıberqaýipsizdik» áskerı-eseptik mamandyǵy boıynsha zapastaǵy ofıtserler daıarlandy.
Radıoelektronıka jáne baılanys áskerı-ınjenerlik ınstıtýtynda 170-ten astam zapastaǵy ofıtserler men serjanttardy oqytý aıaqtaldy.
Oqý qorytyndysynyń basty oqıǵasy — Qarýly kúshter tarıhyndaǵy «Kıberqaýipsizdik» mamandyǵy boıynsha alǵashqy zapastaǵy ofıtserlerdiń túlep ushýy boldy. Sonymen qatar «Baılanys» mamandyǵy boıynsha zapastaǵy serjanttar da oqýyn aıaqtady.
Іs-sharanyń saltanatty qorytyndysy áskerı daıarlyq baǵdarlamasyn sátti aıaqtaǵan joǵary oqý oryndary stýdentteriniń Áskerı ant qabyldaý rásimi boldy.
Áskerı daıarlyq negizgi oqý kestesinen qol úzbeı júrgizildi. Baǵdarlama teorııalyq sabaqtardy, praktıkalyq daıyndyqty jáne áskerı oqý-jattyǵý tájirıbesin qamtydy. «Kıberqaýipsizdik» mamandyǵy boıynsha bilim alǵan bolashaq zapastaǵy ofıtserler aqparattyq júıelerdi qorǵaý jáne kıbershabýyldarǵa qarsy is-qımyl máselelerin pysyqtady. Al «Baılanys» mamandyǵy boıynsha daıyndyqtan ótken serjanttar zamanaýı baılanys quraldaryn ornalastyrý men paıdalanýdy meńgerdi.
— Qazirgi Qarýly kúshter joǵary tehnologııalyq ortada tıimdi jumys isteı alatyn mamandarǵa muqtaj. Sondyqtan zapastaǵy ofıtserler men serjanttardy daıarlaý barysynda teorııalyq bilimmen qatar, áskerı qyzmetshiler naqty jaǵdaıda oryndaýy múmkin mindetterdi tájirıbe júzinde pysyqtaýǵa erekshe kóńil bólinedi. Kıberqaýipsizdik jáne baılanys baǵyttary boıynsha daıyndyq tsıfrlyq tehnologııalardyń qarqyndy damýy jaǵdaıynda suranysqa ıe mamandardy qalyptastyrýǵa múmkindik beredi, — dedi Radıoelektronıka jáne baılanys áskerı-ınjenerlik ınstıtýty akademııalyq utqyrlyq bóliminiń ádiskeri maıor Janarbek Kerimqulov.
Jańa áskerı-eseptik «Kıberqaýipsizdik» mamandyǵynyń alǵashqy túlekteriniń biri — Almaty tehnologııalyq ýnıversıtetiniń stýdenti Azamat Nábıev.
— Oqý bizge tek kásibı bilim berip qana qoımaı, áskerı mamannyń joǵary jaýapkershiligin túsinýge múmkindik berdi. Biz toppen jumys isteýdi, kúrdeli jaǵdaıda sheshim qabyldaýdy jáne alǵan bilimimizdi tájirıbede qoldanýdy úırendik. Áskerı ant qabyldaý — Otanǵa qyzmet etýge jáne alǵan quzyretterimizdi el qaýipsizdigin qamtamasyz etý jolynda paıdalanýǵa daıyn ekenimizdiń belgisi, — dedi ol.
Radıoelektronıka jáne baılanys áskerı-ınjenerlik ınstıtýty memlekettiń qorǵanys qabiletin qamtamasyz etýdiń zamanaýı talaptaryn eskere otyryp, áskerı-eseptik mamandyqtar tizbesin keńeıtýdi jalǵastyryp jatyr.
2025 jyldan bastap ınstıtýtta áýe shabýylyna qarsy qorǵanys baǵyty boıynsha zapastaǵy ofıtserlerdi daıarlaý júzege asyrylyp keledi. Ushqyshsyz ushý apparattarynyń keńinen qoldanylýy jaǵdaıynda mundaı mamandar eldiń áýe keńistigin qorǵaýda mańyzdy ról atqarady.
Instıtýtta áskerı daıarlyq baǵdarlamalary iske qosylǵannan beri zamanaýı áskerı-eseptik mamandyqtar boıynsha 190-nan astam zapastaǵy ofıtserler men serjanttar daıyndaldy.
Osyǵan deıin Áskerı joǵary oqý ornynyń 160-tan asa túlegi ofıtserlik qyzmetke kirisetinin jazǵan edik.
