Qarýly kúshter qyzmetshisi Islam Sátpaev nysana kózdeýden Azııa chempıony atandy
ASTANA. KAZINFORM - Qorǵanys mınıstrligi Sport komıteti – Armııa ortalyq sport klýbynyń áskerı qyzmetshisi, sportshy-nusqaýshy leıtenant Islam Sátpaev Úndistan astanasy Nıý-Delı qalasynda ótip jatqan qurlyqtyq birinshilikte nysana kózdeýden Azııa chempıony atandy.
QR Qorǵnys mınıstrligi baspasóz qyzmetiniń habarlaýynsha, halyqaralyq dárejedegi sport sheberi, Parıj Olımpıadasynyń qola júldegeri 50 metr qashyqtyqtan kishi kalıbrli vıntovkamen jatyp nysana kózdeý saıysynda jeńiske jetti.
Osy baǵdarlamada Qazaqstan quramasynyń taǵy bir ókili Nıkıta Shahtorın kúmis medal ıelendi. Al komandalyq básekede Islam Sátpaev, Nıkıta Shahtorın jáne Konstantın Malınovskıı úzdik nátıje kórsetip, altyn júldege qol jetkizdi.
Jalpy Azııa chempıonatynda Qazaqstan quramasy úsh altyn, eki kúmis medal jeńip alyp, qurlyqtaǵy eń myqty komandalardyń biri ekenin taǵy bir dáleldedi.
Bıylǵy dodaǵa qurlyqtyń 20 elinen 320-dan astam sportshy qatysyp jatyr. Qazaqstan quramasy 47 mergenmen jarysqa tústi.
Qurlyqtyq birinshilik 13 aqpanda aıaqtalady. Áskerı sportshylardyń jeńisi Qarýly kúshterdiń otandyq sportty damytýdaǵy jáne eldiń halyqaralyq bedelin nyǵaıtýdaǵy qomaqty úlesin taǵy bir márte aıqyndaıdy.
Qazaqstandyq arnaıy jasaq halyqaralyq týrnırde top jardy.
