QR Qarýly kúshteri qataryndaǵy zamanaýı tehnıka tanystyryldy
ASTANA. KAZINFORM – Elordadaǵy áskerı parad kezinde elimizdiń Qarýly kúshteri qataryndaǵy zamanaýı tehnıka tanystyryldy.
Saltanatty sherýdi Qazaqstan Qarýly kúshteriniń áskerı tehnıkasy jalǵastyrdy.
Jalpy, armııany jańǵyrtýda otandyq qorǵanys ónerkásibi kesheniniń mańyzy zor. Qazirgi kezde elimizde kóptegen sheteldik analogtardan asyp túsetin qarý-jaraq pen áskerı tehnıkanyń jańa úlgileri shyǵarylady. Paradta brondalǵan mashınalardy, túrli gaýbıtsalardy, jaýyngerlik mashınalar men reaktıvti júıelerdi, dáldigi joǵary zymyran keshenderin, áýe shabýylyna qarsy qorǵanys qarý-jaraǵyn, mınadan tazartatyn tehnıkany tamashalaý múmkindigi boldy.
«Arlan» kópfýnktsıonaldy saýytty dóńgelekti mashınalary «Qazaqstan Paramaýnt Injınırıng» otandyq kásipornynda jasalǵan. Qorǵanys mınıstrligi baspasóz qyzmetiniń málimetinshe, jaýyngerlik mashına áskerı qyzmetke 2016 jyly qabyldandy. Kóp qabatty saýyty ekıpaj ben desanttyń atys qarýy men mınadan qorǵaıdy. Mashınanyń qýatty qozǵaltqyshy jolsyz jerde júrýge beıimdi, al 14 tonna jaýyngerlik salmaǵy jyldamdyqty saǵatyna 120 shaqyrymǵa deıin jetkize alady. 2024 jyldan bastap 15 «Arlan» saýytty dóńgelekti mashınasy Golan jotalarynda Qazaqstan bitimgerlik kontıngentiniń jaýyngerlik mindetterin oryndaýdy qamtamasyz etip keledi.
Sonymen qatar, sherýge T-72 tankteri tartyldy. Ol - Qurlyq áskerleri quramalaryndaǵy negizgi jaýyngerlik tehnıka. Mashınalar «Qazaqstan Injınırıng» kásipornynda tolyq jańǵyrtýdan ótken.
Al jaıaý ásker jaýyngerlik mashınasy (BMP-2) kez kelgen jaǵdaıda, sonyń ishinde shóldi jáne taýly jerlerde, sondaı-aq jaýdyń úzdiksiz atys áserinde qoldanylýy múmkin. Ol sý kedergisin júzip óte alady. Jaýyngerlik mashınada 30 mıllımetrlik avtomatty zeńbirek, tankke qarsy basqarylatyn zymyrandar men pýlemet ornatylǵan. Ol qurlyqtaǵy jáne áýe nysandaryna da atys júrgize alady.
Munymen qosa, parad kezinde BTR-82A jańa nusqasy kórsetildi. Bul tehnıka jaqsartylǵan barlaý múmkindikterine ıe. BTR-de 30 mıllımetr kalıbrli jyldam atylatyn avtomatty zeńbirek jáne 7,62 mm kalıbrli juptastyrylǵan pýlemet ornatylǵan.
Alańǵa 240 mm ózdiginen júretin 2S4 «Tıýlpan» mınometi de shyǵaryldy. Bul qýatty bekinisterdiń artynda turǵan komandalyq pýnkter men jaý tehnıkasyn joıýǵa arnalǵan eń qýatty mınomet júıeleriniń biri.
Sondaı-aq 122 mıllımetr kalıbrli «Grad» dúrkindep atatyn reaktıvti júıeleriniń jaýyngerlik mashınalary – Qurlyq áskerlerindegi ańyzǵa aınalǵan artıllerııalyq júıe. Bul júıe áskerlerge kúshti atys qoldaýyn qamtamasyz ete otyryp, urys qımyldaryndaǵy senimdiligi men tıimdiligimen keńinen tanymal.
300 mm 9k58 «Smerch» reaktıvti júıesi bir mezgilde dúrkindep atý kómegimen nysandardy dáldikpen joıýǵa arnalǵan. 12 baǵyttaýshy qondyrǵy bir oqta 67 gektarǵa deıingi aýmaqty qamtıdy.
Parad kezinde kórermender S-300PS zenıttik-zymyrandyq júıesin tamashalady. Al «Býk-M2E» zenıttik zymyran kesheni áýe shabýylyna qarsy qorǵanys áskerleriniń eń zamanaýı keshenderiniń biri sanalady.
«Tor-M2K» zenıttik-zymyran kesheni ushaqtardy, tikushaqtardy, ushqyshsyz ushý apparattaryn, sondaı-aq qanatty zymyrandar men radıolokatsııaǵa qarsy zymyrandardy qosa alǵanda, dáldigi joǵary qarýlardy tıimdi anyqtaýǵa jáne soqqy berýge qabiletti.
Áskerı sherýde «Terrex 2 – Barys-A 8h8» mýltıfýnktsıonaldy jaýyngerlik mashınasy da kórsetildi. Ol sýda júrý sıpattamalary boıynsha álemdegi eń úzdikterdiń biri bolyp sanalady. Taktıkalyq-tehnıkalyq sıpattamalaryn eskere otyryp, «Terrex» Áskerı-teńiz kúshteriniń desanttyq-shabýyldaý batalonyn jaraqtandyrýdyń negizgi úlgisi retinde usynylady.
«Barys» brondalǵan dóńgelekti mashınalary qashyqtan basqarylatyn «Suńqar» jáne «Ańsar» jaýyngerlik modýlderimen qarýlanǵan. Bul qazaqstandyq «WSE» kompanııasynyń mamandary ázirlegen jańa qarý-jaraq keshenderi. «Barys» aýyr kalıbrli soqqylarǵa jáne artıllerııalyq snarıadtardyń synyqtaryna tótep bere alatyn kúsheıtilgen bronǵa ıe. Sondaı-aq, mashına mınalardan qosymsha qorǵanyspen jabdyqtalǵan.
Budan buryn habarlanǵandaı, elordadaǵy «Qazaq Eli» alańynda Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad ótip jatyr.