Qarýly kúshter qatary áskerı kolledjdiń 90 túlegimen tolyǵady

ASTANA. KAZINFORM – Elordadaǵy Qazaqstan Respýblıkasy Qorǵanys mınıstrliginiń Saǵadat Nurmaǵambetov atyndaǵy áskerı kolledjinde kishi serjanttardyń saltanatty oqýdy aıaqtaý rásimi ótti.

Іs-sharaǵa oqý ornynyń basshylyǵy men jeke quramy, Qarýly kúshterdiń ardagerleri, qoǵam ókilderi, túlekterdiń týystary men jaqyndary qatysty.

Mereke Keńes Odaǵynyń Batyry, Halyq qaharmany armııa generaly Saǵadat Nurmaǵambetovtyń bıýstine gúl shoqtaryn qoıýmen bastaldy. Qatysýshylar Halyq qaharmanynyń rýhyna bir mınýt únsizdikpen taǵzym etti.

Saltanatty sátpen túlekterdi Halyq qaharmany otstavkadaǵy general-leıtenant Baqytjan Ertaev quttyqtady.

– Kishi komandırlerge sarbazdardy oqytý, bólimshelerdegi áskerı tártipti saqtaý jáne jeke quramnyń moraldyq-jaýyngerlik rýhyn nyǵaıtý jaýapkershiligi júkteledi. General Saǵadat Nurmaǵambetov atyndaǵy áskerı kolledjdiń túlegi degen ataqty abyroımen alyp júretinińizge senemin, – dedi ol.

Dıplomdar tabystalǵannan keıin túlekterdi serjanttar korpýsyna qabyldaý rásimi ótti. Aıta ketý kerek, kolledjdiń alty úzdik túlegi QR Qorǵanys mınıstrliginiń áskerı joǵary oqý oryndarynyń ekinshi kýrsyna qabyldanady.

Іs-shara áskerı orkestrdiń súıemeldeýimen ótti. Saptyq sherý kezinde áskerı qyzmetshiler ózderiniń naqty qozǵalystary men qarýdy sheber meńgergenderin kórsetti. Sondaı-aq, qoıan-qoltyq urys elementteri de kórsetildi.

Saltanatty sátti Qazaq ulttyq óner ýnıversıtetiniń “Shabyt” kolledji stýdentterimen birge oryndalǵan túlekter valsi aıshyqtaı tústi.

Mereke Qarýly Kúshterdiń Ulttyq áskerı-patrıottyq ortalyǵynyń shyǵarmashylyq ujymynyń kontsertimen aıaqtaldy.

Buǵan deıin elordadaǵy jetekshi joǵary oqý oryndarynyń stýdentteri áskerı ant qabyldaǵanyn jazǵan edik.