Qarýly kúshter bólimshelerdiń daıyndyq deńgeıin reıtıng arqyly baǵalaıdy
ASTANA. KAZINFORM — QR Ulttyq qorǵanys ýnıversıtetinde jaýyngerlik daıyndyq júıesin jetildirý máselelerine arnalǵan Qarýly kúshter basshylyq quramynyń qyzmettik jınalysy ótti, dep habarlaıdy Qorǵanys mınıstrliginiń baspasóz qyzmeti.
Qorǵanys mınıstri avıatsııa general-leıtenanty Dáýren Qosanov jeke quramdy oqytýda praktıkalyq baǵytty kúsheıtýdi jáne barlyq deńgeıdegi komandırlerdiń jaýyngerlik daıyndyqtyń sapasyna jeke jaýapkershiligin arttyrý qajettigin atap ótti.
Qorǵanys mınıstriniń birinshi orynbasary — Bas shtab bastyǵy general-leıtenant Qanysh Ábýbákirovtiń basshylyǵymen qolbasshylyqtyń jaýyngerlik daıyndyq júıesindegi mindetteri, sondaı-aq basqarý organdary men áskerı bólimderdi joǵary jaýyngerlik daıyndyq deńgeıine keltire otyryp, Desanttyq-shabýyldaý áskerlerin kenetten tekserý nátıjeleri talqylandy.
Jyldyq tsıkl boıynsha jaýyngerlik daıyndyq is-sharalaryn josparlaý men uıymdastyrý máseleleri jóninde Qorǵanys mınıstriniń orynbasary — Áýe qorǵanysy kúshteriniń bas qolbasshysy general-maıor Qaırat Sadyqov, Qurlyq áskerleriniń bas qolbasshysy general-maıor Mereke Kóshekbaev, Áskerı-teńiz kúshteriniń bas qolbasshysy 1-shi dárejeli kapıtan Qanat Nııazbekov, Desanttyq-shabýyldaý áskerleriniń qolbasshysy general-maıor Almaz Jumakeev, sondaı-aq Jaýyngerlik daıyndyq departamentiniń bastyǵy general-maıor Anatolıı Dovganıýk baıandama jasady.
Jıynda biryńǵaı oq atý kýrsy, jaýyngerlik daıyndyq, dene daıyndyǵy máseleleri pánderi boıynsha normatıvter jınaǵyn jańartý, sondaı-aq oqý ortalyqtarynyń kópdeńgeıli júıesin qalyptastyrý, barlaý bólimsheleriniń uıymdastyrýshylyq-shtattyq qurylymdaryn jetildirý máseleleri talqylandy.
Jıynda jeke quramnyń moraldyq-psıhologııalyq jaǵdaıyna da erekshe nazar aýdaryldy. Tárbıe jáne ıdeologııalyq jumys departamentiniń bastyǵy ádilet polkovnıgi Tileýhan Basqojaev áskerı qyzmetshilermen jumys isteýdiń zamanaýı tásilderimen «Pıramıda», «Seriktes» jáne «Jaýyngerlik dos» avtomattandyrylǵan júıeleriniń jumysy týraly baıandady.
— Jınalys qorytyndysy boıynsha zapastaǵy ofıtserlerdi daıarlaý tásilderin jańartý, rezerv, barlaý, tyl men medıtsınalyq qyzmet bólimsheleriniń komandırlik jáne jaýyngerlik daıarlyq baǵdarlamalaryn jańǵyrtý jóninde tapsyrmalar berildi. Sondaı-aq jaýyngerlik daıyndyq deńgeıin obektıvti baǵalaý jáne bólimshelerdiń maqsaty boıynsha mindetterdi oryndaýǵa daıyndyq deńgeıin arttyrýdyń tıimdi quraly retinde olardyń reıtıngin qalyptastyrýǵa biryńǵaı tásil ázirleý máseleleri de ózektendirildi, — delingen habarlamada.
Osydan buryn QR Qorǵanys mınıstrligi áleýmettik jelilerde mınıstr Daýren Qosanovtyń atynan taratylǵan beınemálimdemeniń jalǵan ekenin málimdedi.