Qarýly qylmyskerdi ustap, 6 jasar qyzdy sýdan qutqarǵan eki ulandyq jaýynger marapattaldy
24 qazanda Prezıdent Qasym-Jomart Toqaev Respýblıka kúnine oraı birqatar azamattardy memlekettik nagradalarmen marapattady. Mereke qarsańynda qurmetke ıe bolǵandardyń arasynda Ulttyq ulannyń áskerı qyzmetshileri de bar, dep habarlaıdy Kazinform.
Memleket basshysynyń Jarlyǵymen 5571 áskerı bóliminiń aǵa mamany aǵa serjant Jarqynbek Aıdarhanbekov «Jaýyngerlik erligi úshin» medalimen, al 3477 áskerı bóliminiń áskerı qyzmetshisi efreıtor Tilek Qumarbekov «Erligi úshin» medalimen marapattaldy. Ulttyq ulannyń áskerı qyzmetshilerine memlekettik nagradany Іshki ister mınıstri polıtsııa general-leıtenanty Erjan Sádenov Respýblıka kúni merekesine oraı uıymdastyrylǵan saltanatty is-sharada óz qolymen tabystady.
- Búgin men memlekettik nagrada - "Jaýyngerlik erigi úshin" medalimen marapattaldym. Bul syılyq maǵan eki áıeldi sýyq qarýmen jaraqattaǵan qylmyskerdi ustaǵanym úshin beriledi. Ulttyq ulannyń Bas qolbasshysy general-leıtenant Erkin Botaqanovqa, maǵan osy memlekettik nagradany berý týraly ótinish bildirgeni úshin alǵysymdy bildiremin, - dedi aǵa serjant Jarqynbek Aıdarhanbekov.
Eske salsaq, oqıǵa 2022 jyldyń 18 shildesinde Almaty qalasynda bolǵan. Jarqynbek Aıdarhanbekov saǵat túngi 00:50 shamasynda úıinen shyqqan bette kómek suraǵan áıel adamdardyń aşy daýysyn estigen. Aıǵaı shyqqan jerge jetken áskerı qyzmetshi belgisiz er azamattyń eki áıeldi sýyq qarýmen jaraqattap jatqanyn baıqaıdy. Ulandyqty kórgen sátte buzaqy oqıǵa ornynan izin sýytýǵa tyrysady. Alaıda Jarqynbek qaýipti qylmyskerdi tez ustady.
- Respýblıka kúni qarsańynda "Erligi úshin" medalin alǵanyma qýanyshtymyn. Bul úshin ásker qolbasshylyǵyna shyn júrekten alǵysymdy bildirgim keledi. Ótken jyly men Úlbi ózenine batyp bara jatqan 6 jasar balany qutqardym. Kómekke zárý búldirshindi qutqarýǵa umtylǵan sátte óz ómirimdi oılap jatatyn ýaqyt bolǵan joq, - dedi efreıtor tilek Qumarbekov.
2022 jyldyń 16 shildesi kúni sý aǵynyn eńsere almaı tunshyǵyp jatqan balany baıqaǵan efreıtor Tilek Qumarbekov dereý sýǵa sekirgen bolatyn. Onyń qolynan ustap, jaǵaǵa shyǵarǵany sol edi, kenet ózi sý jutyp, tunshyǵa bastaıdy. Balany qutqaryp úlgergenimen, ózi ózenge batyp bara jatty. Muny kórgen jaǵadaǵylar lezde kómekke kelip, Tilekti sýdan shyǵaryp aldy. Sýda biraz qalyp qoıǵan áskerı qyzmetshi esinen tanyp qalǵan. Aýrýhanaǵa bara jatqan jolda jedel járdem kóliginde oǵan reanımatsııalyq sharalar jasalyp, ol esin jıǵan edi.
Aıta keteıik, táýelsizdik jyldarynda Ulttyq ulannyń 260-qa jýyq áskerı qyzmetshisi áskerı jáne qyzmettik boryshyn úlgili oryndaǵany, zańdylyq pen quqyqtyq tártipti qamtamasyz etýge belsendi qatysqany, qyzmette kórsetken erlikteri, batyldyǵy men janqııarlyǵy úshin memlekettik nagradalarmen marapattalǵan.
