Qarýly adam Atyraýdaǵy emhanadan tramadol dárisin alyp ketken be

ATYRAÝ. KAZINFORM – Atyraý qalasyndaǵy №4 qalalyq emhanada qarý bar adamnyń dári alyp bara jatqany týraly vıdeo taraǵan edi. Osyǵan baılanysty oblystyq densaýlyq saqtaý basqarmasynyń baspasóz qyzmeti túsinik berdi.

Oqıǵa byltyrǵy 27 jeltoqsanda bolǵan. Basqarma tarapynan atalǵan oqıǵa baılanysty tekserý júrgizilgen. 

– Byltyrǵy jyl basynan beri №4 emhanada 27 naýqasqa 625 ampýla túrindegi tramadol dárisi taǵaıyndalǵan. Oǵan qosymsha onkologııalyq naýqastyń tirkelýine baılanysty Atyraý oblystyq onkologııalyq dıspanserinen 50 ampýla tramadoly ýaqytsha (qaıtarym negizinde) alynǵan. Atalǵan jaǵdaı jas mamannyń tájirıbesizdigi saldarynan bolǵany anyqtaldy. Kamera aldynda qobaljyǵan qyzmetker óz áreketin durys túsindire almaı, kúzetshiden dárilerdi ýaqytsha jasyra turýdy ótingen. Óıtkeni bul dáriler qaıtarylýy tıis medıtsınalyq preparat edi, -dep habarlady basqarmanyń baspasóz qyzmeti. 

Oqıǵaǵa baılanysty emhanaǵa kelgen quqyq qorǵaý qyzmetkerleri tekseris júrgizgen. Tekserý kezinde barlyq tramadol dárisi ornynda ekeni rastalǵan. 

– Osy jaǵdaı boıynsha qyzmetkerlerge túsindirý jumystary júrgizildi. Atyraý oblysynyń densaýlyq saqtaý basqarmasy medıtsına mekemelerinde dári-dármekterdi saqtaý men taratý qatań baqylaýda ekenin málimdeıdi. Jalǵan aqparatqa senbeýge jáne taratpaýdy suraıdy, -dep málim etti basqarmanyń baspasóz qyzmetinen.

Al Atyraý oblystyq polıtsııa departamentiniń baspasóz qyzmeti atalǵan derekke qatysty jınalǵan materıal Medıtsınalyq jáne farmatsevtıkalyq baqylaý komıtetiniń Atyraý oblysy boıynsha departamentine joldanǵanyn habarlady.

Eske sala ketelik, budan buryn Atyraý dárigerleri júkti áıelge kúrdeli otany tegin jasaǵanyn jazǵan bolatynbyz.