Qarýdyń saqtalýyna qosymsha talaptardy zańnamalyq túrde bekitý jumystary júrgizilýde
ASTANA. QazAqparat - Qarý men onyń patrondarynyń saqtalýyna qosymsha talaptardy zańnamalyq túrde bekitý jumystary júrgizilýde. Bul týraly «QazAqparat» agenttigine QR Іshki ister mınıstrliginen habarlandy.
«Qazirgi tańda qarý-jaraq dúkenderiniń ornalasýyna jáne tehnıkalyq kesheıtilýine, sondaı-aq qarý men onyń patrondarynyń saqtalýyna qosymsha talaptardy zańnamalyq túrde bekitý jumystary júrgizilýde»,- delingen QR ІІM Memlekettik til jáne aqparat departamentiniń málimetinde.
Vedomstvonyń habarlaýynsha, búginde Qazaqstan boıynsha azamattyq jáne qyzmettik qarý men onyń patrondarynyń saýdasymen aınalysatyn 104 mamandandyrylǵan dúken bar. Aǵymdaǵy jylǵy shilde aıynda aýmaqtyq ishki ister organdarynyń qyzmetkerleri prokýratýra organdarymen birlesip, qarýdyń saqtalýyn qamtamasyz etý turǵysynda azamattyq jáne qyzmettik qarý aınalymy salasynda áreket etetin sýbektilerdiń, onyń ishinde qarý-jaraq dúkenderiniń qyzmetin tekserý sharasyna qatysty.
Esterińizge sala keteıik, bıyl jazda Aqtóbedegi qandy oqıǵadan keıin turǵyndar arasynda qarý-jaraq máselesindegi qaýipsizdik taqyryby keńinen talqylandy. Lańkester toby qarý satý dúkenine shabýyl jasap, qarýlanyp, zańsyz áreketterge bardy.
Aǵymdaǵy jylǵy shildeniń aıaǵynda Aqtóbedegi «Pantera» jáne «Pallada» qarý dúkenderiniń ıelerine qarýdy uqypsyz saqtaǵany úshin 20 AEK kóleminde (40 myń teńgeden astam) aıyppul salyndy. 5 maýsym kúngi teraktide osy qarý dúkenderi tonalǵan bolatyn. Oblystyq prokýratýranyń birinshi basqarma basshysy Maratbek Myrzamuratovtyń aıtýynsha, teraktiden soń qaladaǵy barlyq qarý dúkenderi tekserilgen.
«Pallada» qarý dúkeninde óreskel quqyq buzýshylyqtar anyqtalyp, onyń ıesine 20 AEK kóleminde aıyppul salyndy jáne qarý saqtaý erejelerin buzǵany úshin is qozǵaldy.
«Pantera» qarý dúkeninde de qarý saqtaý talaptary oryndalmaǵan, onyń ıesine de 20 AEK kóleminde aıyppul salyndy.
