Qarýdy qandaı adam satyp ala alady, ony úıde saqtaý tártibi qandaı

ÓSKEMEN. KAZINFORM — Shyǵys Qazaqstan oblysynyń polıtseıleri qarý satyp alǵysy kelgen adamdardyń neni bilýi kerektigin túsindirdi. Zańǵa sáıkes 21 jasqa tolǵan azamat qana azamattyq qarý satyp alýǵa quqyly. Biraq ol úshin ruqsat qaǵazdaryn rásimdeý kerek.

— Eń áýeli turǵylyqty jerińiz boıynsha ishki ister organdaryna eGov portaly arqyly elektrondyq ótinish beresiz. Sizge ańshy kýáligi, qarý ıelenýge qarsy medıtsınalyq kórsetilimderdiń joqtyǵyn rastaıtyn anyqtama jáne qarýdy paıdalana bilý erejeleri boıynsha tekserýden ótkeni týraly anyqtama qajet, — dep habarlady ShQO Polıtsııa departamentinen.

Ruqsat alynǵannan keıin qarý belgilengen talaptarǵa sáıkes saqtalýy tıis.

Atap aıtqanda:

• Qabyrǵasynyń qalyńdyǵy keminde 3 mm bolatyn berik qarý seıfine;

• Seıf edenge nemese qabyrǵaǵa myqtap bekitilýi tıis;

• Seıftiń esigi ishki qulyppen jabdyqtalýy qajet. Qalalarda qarý saqtaıtyn orynnyń dabyl júıesi bolýy tıis. Dabyl sıgnaly ıesine, otbasy múshelerine nemese kúzet uıymyna berile alady. Qandaı kúzet júıesin ornatý kerektigin qarý ıesi ózi sheshedi.

— Qarýǵa qatysty memlekettik qyzmet kórsetý jáne ótinishti qaraý merzimi tirkelgen kúnnen bastap 15 jumys kúnine deıin sozylady. Qarý saqtaý erejelerin buzbaý — qarý ıesiniń mindeti ǵana emes, jeke jáne qoǵamdyq qaýipsizdiktiń kepili, — delingen aqparatta.

Eske salsaq, osyǵan deıin Elorda áýejaıynda sýyq qarý tapsyrý úshin arnaıy jáshik ornatylǵany habarlanǵan.