Qarýdan ózin atyp óltirdi: QR ІІM sarbazdyń qazasyna qatysty málimdeme jasady
Іshki ister mınıstrligi Ulttyq ulan áskerı qyzmetshisiniń qazasyna baılanysty málimdeme jasady. Kazinform bul týraly Polisia.kz-ke silteme jasap habarlaıdy.
Qaıǵyly oqıǵa 9 qazan kúni, túngi saǵat 01:00-de Ulttyq ulannyń 6636 áskerı bóliminde bolǵanyn jazǵan edik. Merzimdi áskerı qyzmetshi, qatardaǵy sarbaz Qaısar Sultanov kezekshilik kezinde bekitilgen shtattyq qarýdan óziniń basyna jaraqat salyp, saldarynan qaza boldy.
«Osy fakti boıynsha Ortalyq óńirlik áskerı-tergeý basqarmasy ózin-ózi óltirýge deıin jetkizý faktisi boıynsha sotqa deıingi tergep-tekserýdi bastady. Tergeý tájirıbeli qyzmetkerlerden qurylǵan jedel-tergeý tobyna tapsyryldy. Qazirgi ýaqytta oqıǵa orny qaralyp, sot-medıtsınalyq saraptama taǵaıyndaldy.
Aıǵaqtar, atap aıtqanda qaza tapqan áskerı qyzmetshiniń uıaly telefony men beınebaqylaý kameralarynyń jazbalary alyndy.
Tergeý barysynda qatardaǵy Sultanovtyń oqıǵa ornynda jalǵyz bolǵany anyqtaldy.
Oqıǵanyń barlyq mán-jaıyn anyqtaý jáne tergeýdiń jan-jaqtylyǵyn qamtamasyz etý úshin Sultanovtyń áskerı áriptesterinen, onyń komandırlerinen, basqa da adamdardan jaýap alý, sondaı-aq tıisti keshendi saraptamalyq zertteý sharalary júrgizilip jatyr. Jábirlenýshi taraptyń ýájderi de tolyq tekseriledi.
Tergeýdiń aldyn ala nátıjeleri boıynsha oqıǵaǵa quqyqtyq baǵa beriledi. Tergeý barysy erekshe baqylaýda», – dedi QR ІІM áskerı-tergeý departamentiniń bastyǵy Serikbaı Qusaıynov.
Ózge aqparat Qylmystyq-protsestik kodekstiń 201-babyna sáıkes jarııa etilmedi.
