Qarýdan 3 adamdy jaraqattady: BQO polıtsııasy kúdiktini ustady
BQO Polıtsııa departamentiniń bastyǵy Arman Orazalıevtiń málim etkenindeı, 5 qyrkúıek kúni Syrym aýdany Araltóbe aýylynda sharýa qojalyǵynyń basshysy mas kúıinde aýyl turǵynymen janjalǵa kelip, arty tóbeleske ulasqan.
Departament bastyǵynyń sózine qaraǵanda, sol kezde kúdikti óziniń «Lexus» avtokóliginen áıeliniń atyna tirkelgen ańshy myltyǵyn alyp, qarsylasyna qaraı birneshe ret oq atqan. Saldarynan atalǵan turǵyn sol jambasyna jáne aıaǵyna jaraqat aldy. Oǵan qosa 59 jastaǵy áıel men onyń eki jasar nemeresine oq tıgen. Asa aýyr qylmys jasaǵannan keıin kúdikti oqıǵa ornynan «Lexus» avtokóligimen boı tasalaǵan.
«Sol kúni adam óltirýge oqtalý deregi boıynsha QR Qylmystyq kodeksiniń 24-baby 3-bóligi, 99-baby 1-bóligine sáıkes sotqa deıingi tergep-tekserý bastaldy. Polıtsııa departamenti jedel izdestirý sharalaryn qolǵa aldy. «Tosqaýyl» jedel jospary engizilip, óńirdiń barlyq jeke quramyna baǵdar berildi.
Sonyń nátıjesinde kúdikti ustalyp, Syrym aýdandyq polıtsııa bóliminiń ýaqytsha ustaý ızolıatoryna qamaldy. Qylmys quraly tárkilenip, qylmystyq is materıaldaryna tirkeldi. Tergeý jalǵasyp jatyr, olardyń nátıjesi boıynsha qosymsha aqparat beriletin bolady», - dedi A.Orazalıev.
Eske sala keteıik, budan buryn BQO-da eki eresek adam men sábıdiń qarýdan jaraqat alyp, aýrýhanaǵa túskenin jazǵan bolatynbyz.
