Qarý-jaraqty óz erkimen tapsyrǵan astanalyqtarǵa 345 myń teńgege deıin syıaqy beriledi
ASTANA. QazAqparat – Elordalyqtardyń zańsyz saqtalǵan jáne tirkelmegen qarý-jaraq, oq-dári jáne jarylǵysh zattardy polıtsııaǵa tapsyryp, syıaqy alý múmkindigi bar. Atalǵan shara 10 sáýirde bastalyp, bir aıǵa sozylady, dep habarlaıdy QazAqparat tilshisi.
«10 sáýirden bastap zańsyz saqtalǵan qarý-jaraq, oq-dári jáne jarylǵysh zattardy qabyldaý respýblıkalyq aktsııasy bastalady. Sondaı-aq, tirkelmegen qarý-jaraqty óz erkimen tapsyrǵan azamattar ákimshilik jáne qylmystyq jaýaptan bosatylady», – dedi Astana qalasy polıtsııa departamentiniń erekshe tapsyrmalar boıynsha aǵa ınspektory, polıtsııa podpolkovnıgi Azamat Ámen brıfıngide.
Sonymen qatar polıtsııa departamentiniń ókili qarý-jaraqty óz erkimen tapsyrǵan jaǵdaıda syıaqy beriletinin aıtty.
«Qarýdy erikti túrde tapsyrǵan azamattarǵa onyń túrine qaraı 10-nan 100 AEK (aılyq eseptik kórsetkish) deıin syıaqy qarastyrylǵan. ıAǵnı qarýdyń túrine, sanatyna jáne saqtalý jaǵdaıyna qaraı 34 500 teńgeden 345 myń teńgege deıin syıaqy taǵaıyndaý kózdelgen. Qarý-jaraqty qabyldaý úsh sanatqa bólinedi. Birinshi tehnıkalyq jaǵdaıy óte jaqsy deńgeıde saqtalǵan qarý, oǵan 100 paıyz kólemde syıaqy beriledi. Ekinshi sanattaǵy qarý-jaraqqa 70 paıyz, al úshinshi sanatqa jatsa onda 30 paıyz kólemde syıaqy taǵaıyndalady. Eskeretin jaıt, syıaqy qarý-jaraqtyń negizgi baǵasyna negizdeledi, ol úshin sala sarapshylarymen keńesemiz», - deıdi ol.
Onyń aıtýynsha, krımınaldyq iske qatysy bar, urlanǵan jáne resmı tirkelgen qarý-jaraq satyp alynbaıdy jáne oǵan syıaqy berilmeıdi.
Sondaı-aq, spıker oq-dári jáne jarylǵysh zattardy ózdiginen tasymaýǵa keńes berdi. Aldymen polıtsııaǵa habarlaǵan jón.
