Qarý-jaraq ustaıtyn astanalyqtar kóbeıip keledi - polıtsııa
ASTANA. QazAqparat – Elordada qarý-jaraq ıeleri jyl sanap artyp keledi. Tolyǵyraq Astana qalasy polıtsııa departamentiniń erekshe tapsyrmalar boıynsha aǵa ınspektory, polıtsııa podpolkovnıgi Azamat Ámen aıtyp berdi, dep habarlaıdy QazAqparat tilshisi.
«Elorda halqy jyl sanap kóbeıip keledi, tıisinshe qarý-jaraq ıelenýshilerdiń de sany kóbeıdi. Astanada qarý-jaraq ustaıtyn adamdar jylyna 500-ge artady. Jalpy suranys bar. Bireýler jeke basyn qorǵaý maqsatynda alsa, ekinshi bir top sport úshin, taǵy bireýler ań aýlaýǵa alyp jatady. Negizinde qarý ustaýǵa ruqsat joǵaryda atalǵan úsh maqsatqa beriledi», – dedi Azamat Ámen polıtsııa departamentinde ótken baspasóz máslıhatynda.
Sondaı-aq, ınspektor qarý-jaraq qoldanyp jasalatyn qylmystardyń azaıǵanyn aıtyp otyr.
«Elordada mundaı qylmystar azaıdy. 2015 jyldan beri travmatıkalyq qarýdy satyp alý aktsııasy ótip keledi. Sodan beri qarýmen jasalǵan qylmys sany aıtarlyqtaı tómendedi. Mektepte qarý-jaraqty qoldaný boıynsha profılaktıkalyq shara ótkizilip turady. Sonymen qatar qarý-jaraq dúkenderiniń ıelerine aqparattyq túsindirý jumystary uıymdastyrylady», - deıdi ol.
Aıta keteıik, elordada 10 sáýirde tirkelmegen qarý-jaraqty satyp alý aktsııasy bastalady.
Onyń aıasynda astanalyqtar qarý-jaraqty óz erkimen polıtsııaǵa tapsyryp 34 500 teńgeden 345 myń teńgege deıin syıaqy ala alady.
Syıaqy qarýdyń túrine, sanatyna jáne saqtalý jaǵdaıyna qaraı belgilenedi.
