Qarý-jaraq saýdasy: Іshki ister mınıstrliginiń birqatar buıryǵy ózgerdi

ASTANA. KAZINFORM – Іshki ister mınıstrligi azamattyq jáne qyzmettik qarýdyń aınalymyna qatysty birqatar buıryqqa ózgeris engizdi. Bul túzetýler qarý ıelerine, satýshylar men jasap shyǵarýshylarǵa qatysty talaptardy naqtylap, baqylaý tetikterin kúsheıtýdi kózdeıdi.

Jeńildetilgen talaptar

Endi konstrýktsııasy qarýǵa uqsas, biraq úrlemeli qýaty 7,5 Dj aspaıtyn, 4,5 mm kalıbrli pnevmatıkalyq qarý men dybys, jaryq jáne tútin belgilerin berý úshin paıdalanylatyn qarýdy 18 jasqa tolǵan azamattar arnaıy ruqsatsyz satyp ala alady. Bul rette satyp alýshydan sottylyǵynyń bolmaýy jáne psıhıkalyq densaýlyǵy týraly anyqtama talap etiledi.

Arnaıy mártebesi bar tulǵalarǵa da jeńildikter berildi. Atap aıtqanda, qarýly kúshter, quqyq qorǵaý organdary men arnaıy memlekettik qyzmetkerler (qyzmet ornynan tıisti qujat usynǵan jaǵdaıda) keıbir qarý túrlerin qosymsha anyqtamasyz satyp ala alady.

Dúken men satýshyǵa qoıylatyn talaptar

Bul baǵyttaǵy talaptar naqtylandy. Qarý satýshylar arnaıy daıyndyqtan ótip, satyp alýshyǵa nusqamalyq júrgizýge mindetteledi. Barlyq saýda arnaıy jýrnalda tirkelip, tıisti qujattar 10 jylǵa deıin saqtalýy tıis. Elektrondyq formatta saqtaý ruqsat etiledi.

Mehanıkalyq tozańdatqyshtar men aerozoldi quraldardyń satylý tártibi de qaıta qaraldy. Bul buıymdardy satý kezinde de satýshy nusqamalyq júrgizýge jáne satyp alýshynyń jasy men densaýlyǵyna qatysty talaptardyń oryndalýyn qadaǵalaýǵa mindetti.

Osylaısha, qarýdyń satylýy, saqtalýy, tasymaldanýy, esepke alynýy jáne joıylýyna qatysty qaǵıdalar qaıta jazylyp, «Jekelegen qarý túrleriniń aınalymyna memlekettik baqylaý jasaý týraly» Zań talaptarymen sáıkestendirildi. Maqsat — qarýdyń zańsyz aınalymyna jol bermeı, qoǵamdyq qaýipsizdikti nyǵaıtý.