Qarý-jaraq satqan qylmystyq toptyń músheleri sottaldy

NUR-SULTAN. QazAqparat - Jaýyngerlik qarý ótkizýmen aınalysqan qylmystyq toptyń múshelerine sot úkimi shyqty, dep habarlaıdy QazAqparat Ulttyq qaýipsizdik komıtetiniń baspasóz qyzmetine silteme jasap.

Qylmystyq bıznesti uıymdastyrýshy S. Bımýrzın QR QK 287-baby 4-bóligi, al onyń sybaılasy F. Týrsýnov QR QK 287-baby 4-bóligi jáne 296-baby 3-bóligi boıynsha qylmys jasaǵany úshin kináli dep tanyldy.

Olar tıisinshe 5 jáne 4 jylǵa bas bostandyǵynan aıyryldy, biraq quqyq buzýshylyqty birinshi ret jasaǵanyn, kinásin moıyndaǵanyn jáne tergeýmen qarqyndy yntymaqtastyǵyn eskere otyryp, jaza shartty túrde taǵaıyndaldy.

15 aqpanda UQK Nur-Sultan qalalyq departamentiniń qyzmetkerleri S. Bımýrzınnen 605 myń teńgege báseńdetkishi bar «TT» tapanshasy men 10 patrondy «jasyryn» satyp alǵan bolatyn.

2019 jylǵy 18 aqpanda olar taǵy da báseńdetkishi bar «PB» tapanshasy men 50 patrondy 675 myń teńgege «satyp aldy». Ol F. Tursynovqa tıesili «Kaspi Gold» bank kartasyna aýdaryldy.

12 naýryzda UQK Almaty jáne Nur-Sultan qalalyq departamentteriniń qyzmetkerleri men Ulttyq ulannyń «Búrkit» arnaıy maqsattaǵy bólimshesi S. Bımýrzın men F. Týrsynovty ustady.

F. Tursynovtyń turǵylyqty jerin tintý kezinde «Reck» markaly gazben atylatyn tapansha, salmaǵy 196 gr marıhýanasy bar úsh polıetılen paket, «Kaspi Gold» bank kartasy, sondaı-aq is úshin máni bar ózge de zattar tabyldy.