Qarý-jaraq, oq-dári, esirtki: Elordanyń blokbeketterinde qandaı zattar tárkilenip jatyr

NUR-SULTAN. QazAqparat – Nur-Sultan qalasy aýmaǵynda 6 blokbeket ornatylǵan. Tótenshe jaǵdaı rejımi kezinde qalaǵa kirip-shyqqan ár adam men kólik jiti tekserilip jatyr. Osyǵan oraı tekseris barysynda jolaýshylardan túrli tyıym salynǵan zattar tabylyp jatqany anyqtaldy.

Bul týraly qalalyq Polıtsııa departamentiniń baspasóz qyzmeti málimdep otyr, dep habarlaıdy QazAqparat tilshisi.

«Polıtseıler ásirese blokbekettegi tártipti erekshe baqylaýda ustaýda. Blokbeketter qoıylǵan sátten bastap tyıym salynǵan zattardy anyqtaý maqsatynda shamamen 50 myń avtokólik tekserildi. Onyń barysynda blokbeketterden 2 tegis uńǵyly «Saıga» myltyǵy, «RGD-5» oqý-jattyǵý granatasy, «SVvz.27» markaly tapansha, oqtan qorǵaıtyn kúrteshe, oq-dáriler, 11 beısbol taıaǵy, 5 rezeńke taıaq, kastetter, dýbınkalar, aerozoldik tapansha, qol kiseni jáne buryshty balonshalar tárkilendi. Barlyq faktiler boıynsha tekserý jumystary júrgizilýde», - delingen habarlamada.

Sondaı-aq, departament málimetinshe, blokbekette esirtkini zańsyz saqtaýdyń 2 faktisi anyqtalǵan.

«Blokbekette avtokólik toqtatylyp, tekserý barysynda urlyq jasady degen kúdikpen 26 jastaǵy jolaýshy anyqtaldy. Buǵan deıin onyń ótken jyldyń maýsym aıynda Pavlodar qalasynda urlyq jasaǵany belgili boldy. Sondaı-aq, ózge avtokóliktiń 36 jastaǵy jolaýshysy Qaraǵandy qalasynda osyǵan uqsas qylmys jasaǵany úshin ustaldy. Blokbekette ustalǵan kúdiktiler izdeý bólimshelerine tapsyryldy», - dep habarlandy qalalyq polıtsııadan.

Nur-Sultan qalasynyń Polıtsııa departamenti turǵyndardan tótenshe jaǵdaı rejımin saqtap, komendanttyq saǵat erejesin buzbaýǵa shaqyrady. Sol sııaqty zańbuzýshylyq úshin jaýapkershiliktiń baryn eske salady.