Qarý tapsyrǵan SQO turǵyndaryna 6 mln teńge tólenedi
PETROPAVL. QazAqparat - Soltústik Qazaqstan oblysynda polıtseıler jyl basynan beri zańsyz aınalymda júrgen 25 qarýdy tárkiledi, dep habarlaıdy QazAqparat tilshisi.
Polıtsııa departamenti baspasóz qyzmetiniń málimdeýinshe, Shal aqyn aýdanynyń Sergeevka qalasynda tártip saqshylary 29 jastaǵy er adamnyń ań myltyǵyn tárkiledi. Ol tirkelmegen myltyqty garajynda saqtap kelgen. Quqyq buzǵany úshin er adamǵa 50 myń teńge mólsherinde aıyppul salyndy. Oblystyń bes turǵyny óz erkimen óteýsiz negizde qarýlaryn tapsyrdy.
«10 sáýir kúni turǵyndardan zańsyz saqtalyp otyrǵan ot qarýlardy, oq-dárilerdi jáne jarylǵysh zattardy satyp alý aktsııasy bastalady. Byltyr oblys turǵyndary ishki ister organdaryna 151 qarý jáne 3,2 myńnan astam patrondy tapsyrǵan. Olarǵa 8 mıllıon teńge tólendi. Bıyl osy maqsatqa 6 mıllıon teńge bólinip otyr», - dep málimdedi departamenttiń baspasóz qyzmeti.
Qarýdy kez kelgen aýdandyq nemese qalalyq polıtsııa bólimshelerine tapsyrýǵa bolady. Arnaýly komıssııa oǵan úsh sanat boıynsha ótemaqy belgileıdi. Ótemaqy saraptamadan keıin tólenedi.
Polıtseıler zańsyz saqtalyp otyrǵan qarýdy óz erkimen tapsyrý azamattardy qylmystyq jáne ákimshilik jaýaptan qutqaratynyn eskertedi.
