Qarý tapsyrǵan SQO turǵyndaryna 10 mln teńgeden astam syıaqy beriledi
PETROPAVL. QazAqparat - Soltústik Qazaqstan oblysynda tirkelmegen qarýlardy erikti túrde tapsyrý aktsııasy aıaqtaldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Turǵyndar tapsyrǵan qarýdyń negizgi bóligi ekinshi sanatqa jatqyzyldy, olar paıdalanýǵa jaramdy, biraq bastapqy túr-túsinen aırylǵan qarýlar. Soltústikqazaqstandyqtar ondaı qarýdyń 170-in tapsyrdy.
Birinshi sanatqa jatatyn 17 jańa qarý jınaldy. Barlyǵy 181 ótinish negizinde 214 dana qarý jáne 1549 oq tapsyryldy.
«QR Ákimshilik quqyq buzýshylyqtar týraly kodeksine sáıkes, ań aýlaýǵa qyzyǵatyn týǵan-týystarynan qalǵan estelik qarýdy saqtaý 25 AEK kóleminde aıyppul salýǵa negiz bolady. Al eger óz erkimen ákelip tapsyrsa, jazaǵa tartylmaıdy», - deıdi SQO ІІD ákimshilik polıtsııa basqarmasynyń bólim bastyǵy Alekseı Belov.
Aktsııa 10 sáýirde bastalǵan. Turǵyndardyń qolyndaǵy qarýdy satyp alý úshin respýblıkalyq bıýdjetten 10 mıllıon teńge qarjy bólindi. Soltústikqazaqstandyqtar tapsyrǵan qarýdyń tólemaqysy odan jarty mıllıonǵa kóp. SQO ІІD baspasóz qyzmetindegiler qosymsha qarjy bólinip, syıaqylar tolyǵymen beriletinin jetkizdi.
