Qarý tapsyrǵan qazaqstandyqtarǵa memleket 84 mln teńge tóledi

ASTANA. QazAqparat – El turǵyndary 1,2 myńǵa jýyq qarýdy erikti túrde tapsyrdy. Bul týraly Іshki ister mınıstrligi Ákimshilik polıtsııa komıteti Qarý aınalymyn baqylaý basqarmasynyń bastyǵy Asylbek Ydyrysov aıtty, dep habarlaıdy QazAqparat tilshisi.

«Bıyl halyqtan zańsyz saqtalǵan qarý-jaraqtardy satyp alý aktsııasy 10 sáýirde bastaldy. Ony ótkizýge respýblıkalyq bıýdjetten 88 mln teńgeden astam qarajat bólindi. Búgingi kúni polıtsııaǵa erikti túrde jalpy sommasy 84 mln bolatyn 1 181 birlik qarý, 18 myńnan astam oq-dáriler tapsyryldy», - dedi basqarma bastyǵy mınıstrliktiń baspasóz alańynda ótken brıfıngte.

ІІM ókiliniń atap ótýinshe, polıtsııa departamentteri aldyn ala usynǵan málimetterge sáıkes, Astana, Almaty, Shymkent qalalarynda, Aqmola, Aqtóbe, Almaty, Atyraý, Qaraǵandy, Qostanaı, Mańǵystaý, Soltústik Qazaqstan, Jetisý jáne Ulytaý oblystarynda bólingen qarajattyń ıgerilýine baılanysty aktsııa toqtatylǵan.

«Taldaý kórsetkendeı, qarýdyń eń kóp tapsyrylǵany Túrkistan oblysynda – 187, Jambyl oblysynda – 134, Qyzylorda oblysynda – 94, Abaı, Aqmola, Aqtóbe, Shyǵys Qazaqstan, Qaraǵandy jáne Pavlodar oblystarynda – 60 birlikten astam. Azamattardyń zańsyz saqtalǵan qarý-jaraqty erikti túrde tapsyrý tártibi Іshki ister mınıstriniń 2015 jylǵy 27 naýryzdaǵy № 266 buıryǵymen bekitilgen qaǵıdaǵa sáıkes júrgiziledi. Zańsyz saqtalǵan qarý-jaraq zattaryn erikti túrde ótemaqyǵa tapsyrýǵa nıet bildirgen azamat, eger onyń áreketterinde ózge quqyq buzýshylyq quramy bolmasa qylmystyq jáne ákimshilik jaýapkershilikten bosatylady», - dedi Asylbek Ydyrysov.

Sondaı-aq basqarma bastyǵy óz erkimen qarý tapsyrǵandar qansha teńgeden ótemaqy alǵanyn aıtty.

«Qarýdy ótemaqyǵa tapsyrǵany úshin tólenetin tólemder mólsheri olardyń túrine, tehnıkalyq kúı-jaıyna baılanysty ár birligi úshin 34 myńnan 345 myńǵa deıingi aralyqta bolady. Syıaqy kólemin ár oblystyq, qalalyq jáne aýdandyq polıtsııa organdarynda qurylatyn komıssııalar belgileıdi», - dedi ol.

Málim etilgendeı, krımınalıst-mamannyń qorytyndysy negizinde atys qarýy, oq-dári nemese jarylǵysh zat retinde tanylmaǵan, ІІM bazasynda «Tirkelgen qarý» jáne «Krımınaldyq qarý» esebinde turǵan qarý-jaraqtarǵa, qoldan jasalǵan, sondaı-aq tegis uńǵyly, gazdy jáne jaraqat salatyn patrondarǵa syıaqy tólenbeıdi.