Qarý men qalamdy qatar ustaǵan sarbazdar: Áskerılerdiń jańa áni jaryq kórdi
ASTANA. KAZINFORM — «Búgin LIVE» stýdııasynda taǵy bir rýhty ánniń tusaýy kesildi.
Otan aldyndaǵy boryshyn abyroımen atqaryp júrgen jas sarbazdar tikeleı efırde júrek tebirenter týyndylaryn qalyń kórermenge tartý etti.
Áriptesterimizge suhbat bergen komendanttyq rotanyń atqyshtary eń áýeli ózderiniń áskerı ómirge qalaı aıaq basqandaryn baıandady.
— Bala kezimnen áskerı adamdarǵa syrttaı qyzyǵatynmyn. Áskerı formamen júrgenderiniń ózi ádemi kórinetin. Syrtynan qarasań, rýh beredi. Basqalar da meni syrttaı kórgende týra sondaı áser alatyn sııaqty kórindi. Sol úshin osy áskerı salaǵa qyzyqtym. Negizinen Qaraǵandy qalasyndaǵy Búketov atyndaǵy Qaraǵandy zertteý ýnıversıtetinde bilim alyp jatyrmyn. Qazirgi tańda akademııalyq demalys alyp, eń áýeli Otan aldyndaǵy boryshymdy óteýdi sheshtim, — deıdi qatardaǵy jaýynger Almas Meırash.
Almas Meırash dosynyń da Otan aldyndaǵy boryshyn óteýine sep bolǵan kórinedi.
— Jalpy, Almas ekeýmizdiń áskerge kelýimiz qyzyq boldy. Almas maǵan áskerge baratynyn aıtty. Sosyn men de birge baryp, bárin birge kóreıik dedim. Birinshi Almas, artynan men bardym, — deıdi Erasyl Ánýarbek.
Qamtamasyz etý batalonynyń qos jaýyngeri áskerı mindetin atqaryp bolǵan soń da sarbaz bolýdy jalǵastyrǵylary keletinin aıtty.
— Otan aldyndaǵy boryshyn ótep júrgen árbir sarbazdyń eń basty maqsaty — óz otbasyna aman-esen oralý dep oılaımyn. Odan bólek, eger oıymyz ózgermese, mindetimizdi atqaryp bolǵan soń áskerde kelisimshartpen qalýdy josparlap otyrmyz, — deıdi olar.
Jas jaýyngerlerdi tanystyrǵan — óner joly. Almas pen Erasyl áskerde de qabiletterin shyńdaýdy esten shyǵarmapty. Óleń jazyp, án aıtyp, aspaptarda da oınaı alady eken. Al bir bolmysyna túrli ónerdi darytqan Almas Meırash tikeleı efırde sý jańa týyndysynyń tusaýyn kesti.
— Avtorlyq ánimniń shyqqanyna kóp ýaqyt bolǵan joq. Bir aptadan endi asqan shyǵar. Osylaı qarýlas dostarymdy kórip, olardyń jigerin, rýhyn kórip shabyt alyp, «Ulttyq ulan jigitteri» degen án jazǵanmyn, — deıdi sarbaz.
Eske sala keteıik, buǵan deıin «Búgin LIVE» stýdııasyna rýhty daýysymen 20 jyl boıy áskerı paradty júrgizgen dıktor qonaq bolǵan edi.