«Qarý» is-sharasy barysynda elordada 57 adam jaýapqa tartylyp, 86 qarý tárkilendi

NUR-SULTAN. QazAqparat – Elordada atys qarýyn qoldanylatyn qylmystardyń aldyn alý jáne jolyn kesý, sondaı-aq azamattyq jáne qyzmettik qarý aınalymyna memlekettik baqylaýdy júzege asyrý maqsatynda 17 mamyrdan bastap qala aýmaǵynda «Qarý» jedel-aldyn alý is-sharasy júrip jatyr.

Bul týraly QazAqparat Nur-Sultan qalasy polıtsııa departamentiniń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, azamattyq, qyzmettik qarý ıelerin tekserý uıymdastyryldy. Tirkelmegen atys qarýyn, oq-dárilerdi, jarylǵysh zattar men jarylǵysh qurylǵylardy anyqtaý jáne zańsyz aınalymnan alý boıynsha is-sharalar júrgizilip jatyr.

Tórt kún ishinde jedel aldyn alý is-sharasy barysynda 2 476-dan astam qarý ıeleri tekserilip, saqtaý men alyp júrýdiń 35 faktisi, qarýdy tirkeý tártibin buzýdyń 22 faktisi anyqtaldy. Barlyq 57 ıesi ákimshilik jaýapqa tartyldy. Qarý aınalymy erejesin buzǵany úshin tirkelgen qarýdyń 86 birligi tárkilendi. Zańsyz saqtalǵan qarýdyń 6 birligi tárkilendi.

Tekserý jumystary kezinde polıtsııa qyzmetkerleri Qudaıberdiuly-Manas kósheleriniń qıylysynda 38 jastaǵy qala turǵynyn ustap, odan tapansha tabyldy.

Mamannyń qorytyndysyna sáıkes, tárkilengen tapansha «OSA» uńǵysyz atys quraly bolyp shyqty. Sondaı-aq reıd barysynda Aqtolqyn kóshesindegi úıdiń tóbesinde «IJ-17» markaly atys qarýyn saqtaǵan 53 jastaǵy qala turǵyny anyqtaldy.

Er adamnyń aıtýynsha, ol myltyqty úıiniń shatyrynan tapqan. Barlyq faktiler boıynsha tekserý júrgiziledi. «Qarý» jedel-aldyn alý sharasy 17 maýsymǵa deıin jalǵasady.