Qarý ıeleri men kúzet qyzmeti uıymdaryna talaptar kúsheıtiledi — Májilis
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine kúzet qyzmeti máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Zań jobasyn kúzet qyzmeti salasynda memlekettik baqylaýdy júzege asyrý tártibin jetildirý jáne qarý ıeleri men kúzet qyzmetin júzege asyratyn uıymdarǵa qoıylatyn talaptardy kúsheıtý maqsatynda Parlament Májilisiniń depýtattary ázirledi.
— Qujatta kúzet qyzmeti sýbektileriniń quqyqtary men qarý aınalymy jáne Memlekettik oq-gılza qoımasyn qalyptastyrý salasyndaǵy zańnamanyń talaptary naqtylanady, sondaı-aq azamattyq jáne qyzmettik oıyq uńǵyly atys qarýyn baqylaý maqsatynda atysty ýaqtyly júrgizý jónindegi mindetteme engiziledi, — dedi Májilis depýtaty Magerram Magerramov.
Sonymen, zań jobasynda mynadaı negizgi túzetýler engizý eskerilgen:
— qarý ustaıtyn zańdy tulǵalar úshin óz qyzmeti toqtatyla turǵan jaǵdaıda, 10 jumys kúni ishinde qarý men onyń patrondaryn ishki ister organdaryna saqtaýǵa tapsyrý mindetin engizý;
— kúzet qyzmeti sýbektileriniń olar júzege asyratyn qyzmet týraly eseptilikti ýákiletti organǵa usyný mindetin zańnamalyq deńgeıde bekitý. Osy eseptilikti usyný nysany men kezeńdiligin ýákiletti organ bekitetin bolady;
— jekeshe kúzet uıymdary úshin ýákiletti organdy óz qyzmetin toqtata turý, toqtatý nemese qaıta bastaý, sondaı-aq tirkeý ornynan tys jerde kúzet qyzmetterin kórsetý jaǵdaılarynda 5 jumys kúni ishinde habardar etý mindetin engizý;
— jekeshe kúzet uıymdarynyń fılıaldary men ókildikteriniń basshylaryna, kúzetshi laýazymyn atqaratyn qatardaǵy jumyskerlerge qoıylatyn mindetti talaptardy engizý;
— qarý ıelerine baqylaý atysyn júrgizý úshin azamattyq jáne qyzmettik oıyq uńǵyly atys qarýyn berý mindetin engizý;
— Qarýly Kúshterdiń, basqa da áskerler men áskerı quralymdardyń, arnaýly memlekettik jáne quqyq qorǵaý organdarynyń qarýyndaǵy qarý negizinde Memlekettik oq-gılza qoımasyn qalyptasýyna memlekettik baqylaý talaptaryn naqtylaý;
— quqyq qorǵaý organdarynyń, sondaı-aq arnaýly memlekettik organdardyń, azamattyq qorǵaý organdarynyń qyzmetkerlerin jáne áskerı qyzmetshilerdi turǵynjaımen qamtamasyz etý jáne olarǵa turǵyn úı tólemderin júzege asyrý tártibin jetildirý;
— «Áskerılendirilgen temirjol kúzeti» degen uǵymdy engizý. Bul aktsııalardyń baqylaý paketi ulttyq basqarýshy holdıngke nemese Ulttyq temirjol kompanııasyna tıesili zańdy tulǵa.
— Áskerılendirilgen temirjol kúzeti qyzmetiniń negizgi maqsaty — tranzıttik temirjol júk tasymaldaryna tartylǵan termınaldar aýmaqtarynda júkterdi jáne temirjol kóligi obektilerin úzdiksiz kúzetýdi qamtamasyz etý. Sonymen birge, zań jobasyn sapaly jaqsartqan redaktsııalyq sıpattaǵy jáne naqtylaý sıpatyndaǵy basqa da túzetýler bar, — dedi depýtat.
Resmı málimet boıynsha, eldegi kúzet uıymdarynyń qolynda 22 myńnan astam qarý bar.