«Qarý» aktsııasy: 908 azamatqa shamamen 91 mıllıon teńge tólendi
«Qarý» aktsııasy aıasynda eń kóp atys qarýy Túrkistan, Jambyl, Shyǵys Qazaqstan jáne Pavlodar oblystarynyń polıtsııa departamentterine tapsyryldy. Búgingi kúni qarý-jaraq zattaryn óz erkimen tapsyrǵan 908 azamatqa shamamen 91 mıllıon teńge tólendi», - dedi Nurdildá Oraz mınıstrliktiń baspasóz alańynda ótken dástúrli brıfıng barysynda.
Onyń atap ótýinshe, tarıhı qyzyǵýshylyq týdyratyn úlgilerdi qospaǵanda, erikti túrde tapsyrylǵan atys qarýy, oq-dáriler, jarylǵysh zattar joıylady.
«Mysaly, Qaraǵandy oblysynyń turǵyny Týla qarý-jaraq zaýytynda 1900 jyly shyǵarylǵan «Nagan» markaly sholaq revolverin tapsyrdy. Ol revolver marqum atasynan qalǵan sandyqtan tabylǵanyn aıtqan. Komıssııa revolverdi Qaraǵandy oblysy polıtsııa departamentiniń murajaıyna eksponat retinde berý týraly sheshim shyǵardy», - dedi resmı ókil.
Nurdildá Orazdyń aıtýynsha, Shyǵys Qazaqstan oblysynyń zeınetkeri ótken ǵasyrdyń basynda shyǵarylǵan «Braýnıng» markaly tapanshanyń alǵashqy úlgileriniń birin tapsyrǵan. Bul qarýmen kezinde Belgııa men AQSh áskerleri qarýlanǵan. Tapansha da eksponat retinde murajaıǵa ótkizildi.
«Tirkelmegen atys qarýyn, oq-dárilerdi jáne jarylǵysh zattardy óz erkimen tapsyrǵan azamattar qylmystyq jáne ákimshilik jaýapkershilikten bosatylatynyn atap ótý qajet. Sońǵy 5 jylda atys qarýyn qoldaný arqyly jasalǵan qylmystar sanynyń 2 ese tómedeýi qabyldanyp jatqan is-sharalardyń tıimdiligin aıǵaqtaıdy», - dedi ol.