«Qarý-2010» jedel aldyn alý is-sharasy barysynda zańsyz saqtalǵan 22 qarý tárkilendi
ASTANA. Sáýirdiń 15-i. QazAqparat - «Qarý-2010» jedel aldyn alý is-sharasynyń 3 kúninde elordalyq polıtseıler zańsyz saqtalǵan 22 qarýdy tárkiledi,
dep habarlady Astana qalalyq ІІD til saıasaty jáne aqparat bóliminen.
Habarlamada polıtsııa qyzmetkerleri 3 kúnniń ishinde 104 reıdik is-sharalar ótkizip, oǵan 1000-ǵa tarta quqyq qorǵaýshylar qatysqandyǵy aıtylǵan.
«Іs-shara barysynda zańsyz saqtalǵan 22 qarý tárkilendi. Olardyń qatarynda oq-dárimen atylatyn jáne jaraqat salatyn qarýlar, sholaq myltyqtar, oqpen atylatyn qarýǵa aınaldyrylǵan gaz pıstoletteri, elektroshokerler, sondaı-aq sholaq myltyqtardyń zańsyz saqtalǵan oq-dárileri tárkilendi», delingen baspasóz baıanynda.
Sáýirdiń 12-si men 16-sy aralyǵynda ótkizilip jatqan «Qarý-2010» respýblıkalyq is-sharanyń negizgi maqsaty - otty qarýdy, jarylǵysh zattardy jáne qurylǵylardy paıdalaný arqyly jasalatyn qylmystardyń aldyn alý jáne ashý.
Osy shara barysynda elordalyq polıtseıler azamattar arasynda óz erikterimen qarýdy, oq-dárilerdi, jarylǵysh zattardy jáne qurylǵylardy tapsyrýǵa úgitteıtin aýqymdy túsindirý jumystaryn júzege asyrady.
