Qarttyqty krýızde ótkizý: AQSh-ta laıner ishindegi páterler satylyp jatyr

ASTANA. KAZINFORM — Zeınetke shyqqanda kóptegen býmerler (1940-1960 jyldary týǵandar) baspana shyǵynyn azaıtý úshin 55 jastan asqandarǵa arnalǵan turǵyn úıge nemese zeınetkerler qaýymdastyǵyna ınvestıtsııa salýdy jón kóredi. Al basqalary budan da batyl qadamdarǵa barady.

круиз
Фото: Pixabay

Máselen, 63 jastaǵy Debra Kılgor 1,9 mıllıon dollarǵa krýız laınerinen páter satyp alǵan jáne jalǵyz saıahattaýdy josparlap otyr. Bul keme búkil álemdi sharlaıdy jáne kelesi baǵytty turǵyndar daýys berý arqyly anyqtaıdy, dep habarlaıdy Kazinform New York Post agenttigine silteme jasap.

krýız laıneri
Foto: nypost.com

Eki balasy jáne eki nemeresi bar Debra biraz jyl buryn ajyrasqan. Ol jalǵyz saıahattaǵandy unatady, óıtkeni bul oǵan barynsha erkindik beredi. Onyń AQSh aýmaǵynda jalǵyz ózi jáne 9 jasar ıti Chý Chý Bellamen birge saıahattaýdy unatatyn avtokólik-úıi de bar.

— Meniń ıtim Kanadaǵa, Gavaıı araldarynyń barlyǵyna jáne AQSh-tyń kóptegen jerine barǵan, — deıdi D. Kılgor.

Biraq Chý Chý Bellanyń eń úlken saıahaty alda — ony 2027 jyly teńizge shyǵatyn Storylines kompanııasynyń MV Narrative atty turaqty turýǵa arnalǵan krýız laıneri kútip tur. Onda úı janýarlaryn alyp júrýge ruqsat etilgen, tipti bortta veterınar da bar.

Debra Kılgor Kolorado ózeniniń boıyndaǵy Arızona shtatynyń Parker qalasynda turady. Alǵash ret onyń dosy álemdegi alǵashqy turaqty baspanasy bar krýız laıneri — The World-dan páter satyp alǵan. Bul jabyq baspana-ıahta 2002 jyly teńizge attanǵan. Atalǵan kemede ómir súrý quqyǵyn alý úshin turǵyndardyń baılyǵy keminde 10 mıllıon dollar bolýy kerek jáne kemede turyp jatqan bir adamnan shaqyrtý alýy kerek.

Arada jıyrma jyl ótken soń, 2022 jyldyń aqpanynda ol Storylines MV Narrative atty jańa lıýks baspana-laıner týraly maqalany kóredi. Bul keme densaýlyq pen turaqtylyqqa erekshe mán beretin joba retinde usynylyp jatqan edi.

Eki aptadan soń D. Kılgor 12-qabattaǵy (barlyǵy 18 qabat) bir jatyn bólmeli, jýynatyn bólmesi bar 1,9 mıllıon dollarlyq páterge 10 000 dollar depozıt salyp, satyp alýǵa sheshim qabyldaıdy.

krýız laıneri
Foto: nypost.com

MV Narrative kemesinde 22-183 sharshy metr aralyǵynda tolyq jabdyqtalǵan 530 páter bar. Stýdııa-páterler 1 mıllıon dollardan bastalsa, 2 qabatty, 4 bólmeli páterler úshin 8 mıllıon dollarǵa deıin jetedi.

Baǵasy tym joǵary bolyp kórinse, Storylines kompanııasy bir páterdi 4 adamǵa deıin ortaq menshikke alýǵa múmkindik beredi. Ortaq ıelik baǵalary 628 000 dollardan bastalady, sondaı-aq qysqa merzimge jalǵa beriletin stýdııalar shamamen 500 000 dollarǵa baǵalanǵan.

krýız laıneriniń páterleri
Foto: nypost.com

Al Debrany bul usynystardyń eshqaısysy qyzyqtyrmaıdy. Ol balkonynan sheksiz teńizge qarap, ózimen-ózi bolýdy asyǵa kútedi.

— Jalǵyz saıahattaý erkindik beredi, — deıdi ol, — Eshqandaı josparǵa baılanbaısyń. Negizgi týrıstik baǵyttarǵa emes, jergilikti turǵyndar ǵana biletin jerlerge baryp, erekshe tájirıbe jınaýǵa bolady.

Jańa krýız-úıinde Debra Jerorta teńizin, Ońtústik Tynyq muhıtyn, Grekııa araldaryn jáne Galapagos araldaryn kórýdi asyǵa kútedi.

Kemeniń resmı saıtynda: «Ortalyq táýlik boıy jumys isteıdi jáne teńizge qaraǵan jattyǵý zaly, júzý basseıni, medıtatsııa zaly, fıtnes sabaqtaryna arnalǵan oryndar, relaksatsııa kapsýlalary, djakýzı, bý bólmesi, tynys alý jáne medıtatsııaǵa arnalǵan oryndyqtar, qalpyna keltirý massaj kreslolary, ınfraqyzyl saýnalar jáne taǵy basqa múmkindikter bar» dep jazylǵan. Qosymsha tólem jasalsa, premıým deńgeıdegi alkogoldi ishimdikter men joǵary sanatty meıramhana sııaqty erekshe qyzmetter qoljetimdi bolmaq. Eger vıntajdy frantsýz shampany men vagıý steıkin qalasańyz, budan da kóp tóleýge daıyn bolyńyz. Kompanııanyń málimetinshe, 20 túrli meıramhana men sharap bary, kofehana, shashtaraz jáne spa-salondy qosa alǵanda, barlyq mázirdiń 80%-y jyldyq tólemge kiredi.

Aıta keteıik, 2025 jyldyń aqpan-naýryz aılarynda Kaspııde krýız laıneri tolyqqandy júre bastaıdy. Laıner Astrahan (Reseı), Aqtaý (Qazaqstan), Túrikmenbashy (Túrikmenstan), Amırabad, Noýshehr, Enzelı porty (Iran Islam Respýblıkasy), Baký (Ázerbaıjan Respýblıkasy), Mahachkala (Reseı) porttaryna toqtaıdy.

Сейчас читают