Qarttarǵa tegin tamaq taratqan almatylyq áıel marapatqa ıe boldy
Olardyń ishinde almatylyq kelinshek Rásıma Temirbaeva bar.
Ol qamqorlyqqa muqtaj qart kisilerge kúnine 400 tamaq taratady. Qazir Almatyda onyń 2 tamaqtandyrý orny bar. Qarııalar kúnde tańerteń sol jerge baryp ystyq tamaq ishedi.
Rásıma Temirbaevaǵa «Meıirim jolynda» atalymy boıynsha 1-oryn berildi.
«Asar» atalymy boıynsha Qaraǵandy oblysynan Symbat Elikbaeva jeńimpaz atandy.
Boıjetken bylǵarydan ulttyq kıim tigip satýmen aınalysady. Ol kópbalaly otbasydan shyqqan muqtaj balalardy tegin oqytady. Osy úshin Symbat Elikbaeva 1-orynǵa laıyq dep tanyldy.
«Týǵan jer» atalymy boıynsha atyraýlyq Arman Haırýllın top jardy. Ol 2017 jyly 10 myń kóshetti otyrǵyzý boıynsha aktsııa uıymdastyrǵan. Jasyl jelek qoryn saqtaý maqsatynda onyń bastamasymen «Atameken Eko» qoǵamdyq qory quryldy.
«Batyl júrek» boıynsha Aqmola oblysynyń turǵyny 10 jastaǵy Uldana Sovet jeńimpaz atandy. Qyz bala tún ishinde órtengen úıden inisi men sińlilerin alyp shyqqan.
«Qaıyrymdylyq tarıhy» boıynsha Soltústik Qazaqstan oblysynyń turǵyny Aleksandra Kondratova marapattaldy. Jýrnalıst «Nedelıa SK» gazetinde birqatar qıyn jaǵdaıǵa dýshar bolǵan muqtaj adamdarǵa kómek surap maqala jazǵan.
«Qaıyrymdylyq kerýeni» baıqaýynyń barlyq jeńimpazdaryna músinshe, «Oqjetpes» emdeý-saýyqtyrý ortalyǵyna joldama berildi.
Batyl qyz Uldanaǵa noýtbýk syılandy.
Odan bólek, QR Tuńǵysh Prezıdenti - Elbasy qory eki arnaıy syılyq taǵaıyndady. Onyń biri Ravıl Nasıfýllınge buıyrdy. Jas jigit eskirgen kompıýterlik tehnıkany buzyp, jańa kompıýter qurastyryp muqtaj otbasylarǵa tegin taratyp shyqqan.
Ekinshi arnaıy syılyqty Saıra Mataıbaeva aldy. 2016 jyly ol 5 mln teńgesin qaıyrymdylyqqa jumsaǵan. 2017 jyly 12 mln teńgesin bergen. Qazir óz qarjysyna Qosshy aýylynda 200 oryndyq mektep salyp jatyr.
