Qarttardy eń aldymen balalary men nemereleri quttyqtasa eken – Sara Tasemenova
PETROPAVL. QazAqparat – Petropavl qalasynda búginde 44 myń 151 zeınetker turady. Qarttar kúninde olardyń eshqaısy umyt qalmaıdy, dep habarlaıdy QazAqparat tilshisi.
1 qazan – Halyqaralyq qarttar kúni. Úlkendi syılap, qurmetteý – ejelden kele jatqan ata saltymyz. Bıyl da osy mereke qarsańynda elimizde qarttardy qoldaý aılyǵy uıymdastyryldy. Soltústik Qazaqstan oblysynda 21 qyrkúıek kúni qaıyrymdylyq senbiligi ótti. Oǵan 550-den astam kásiporyn men uıym qatysty. Kóptegen eńbek ujymdary bir kúndik jalaqylaryn aýdaryp jatyr. Ardagerler keńesi uıymdastyrý komıtetiniń sheshimimen bul qarajattyń 50% keńestiń esepshotyna aýdarylsa, qalǵany mekemeniń ardagerlerine qalmaq.
«Kórsetilip jatqan kómekke alǵysymyz sheksiz. Esepshotqa túsip jatqan qarajatty eń aldymen muqtaj zeınetkerlerdiń qajetine jumsaımyz. Óte aýyr jaǵdaıda turyp jatqan qarttarymyz bar. Olarǵa dári-dármek, otyn-kómir, tipti, kıim-keshekke deıin kerek. Sońǵy jyldary aýyldardan zeınetkerlerimiz kóptep kóship kelip jatyr. Olar óz ujymdarynan aırylyp qaldy, biz olardy mektepterge bólip berdik. Mereke kúni olarǵa oqýshylar kontsert qoıady. Bizdiń azyn-aýlaq syılyǵymyz bar. Árıne, oblys ortalyǵyndaǵy barlyq kásiporyn-uıymdar dástúr boıynsha óz zeınetkerlerin quttyqtaıtyn bolady», - deıdi Petropavl qalalyq ardagerler keńesiniń tóraǵasy Sara Tasemenova.
Qazir Petropavl qalasynda 44 myń 151 zeınetker turady. 49 – Uly Otan soǵysynyń ardageri, maıdangerlerdiń 280 jesiri, Lenıngrad qursaýynyń 6 turǵyny jáne fashıstik kontslagerlerdiń kámeletke tolmaǵan 16 tutqyny turady. Tek Petropavlda ǵana ardagerlerdiń eki júzden astam bastaýysh uıymy bar.
«Qart adamdarǵa eń bastysy kóńil ǵoı. Biz ardagerler keńesi qala turǵyndarynan eń aldymen ózderiniń qart ata-analaryna kóńil bólýin suraımyz. Mereke kúni qastarynan tabylsa, qal-jaǵdaılaryn surap, ýaqyttaryn bólse – balalarynyń tileýin tilep otyrǵan ata-anaǵa odan artyqtyń keregi de joq», - deıdi Sara Tasemenova.
Petropavl qalalyq ardagerler keńesi tóraǵasynyń aıtýynsha, 1 qazan kúni oblys ortalyǵynda kóptegen is-sharalar ótpek. Jastar saraıynda saltanatty merekelik shara ótse, N.Pogodın atyndaǵy oblystyq orys drama teatrynda qaıyrymdylyq spektakli qoıylmaq. Sondaı-aq mereke kúnderi ardagerlerdiń shahmattan spartakıadasy ótedi.
Zeınetkerlerdiń bul is-sharalarǵa qoǵamdyq kólikpen tegin qatynaýǵa múmkindikteri bar. Buǵan deıin «SQO Avtokólik odaǵy» qaýymdastyǵynyń dástúrli aktsııany bıyl da jalǵastyratynyn aıtqan edik.
