Qarttardyń kútimge muqtajdyǵyn Otbasynyń tsıfrlyq kartasy arqyly anyqtamaq
ASTANA. KAZINFORM — Qazaqstanda Otbasynyń tsıfrlyq kartasyn egde jastaǵy adamdardyń kútimge qanshalyqty muqtaj ekenin anyqtaý úshin paıdalaný múmkindigi qarastyrylyp jatyr. Júıedegi málimetter arqyly ózdiginen júrip-turýy men kúndelikti tirshiligin atqarýy qıyndaǵan azamattardy erterek anyqtap, olarǵa qajetti kómekti uıymdastyrý josparlanǵan.
Bul týraly Premer-mınıstr Oljas Bektenov depýtattyq saýalǵa bergen jaýabynda málimdedi.
Úkimet basshysynyń jaýabyna qaraǵanda, Otbasynyń tsıfrlyq kartasynda qazirdiń ózinde egde jastaǵy adamdardyń fýnktsıonaldyq jaǵdaıyn baǵalaýǵa múmkindik beretin birqatar málimet jınaqtalǵan. Aldaǵy kezeńde osy derekter negizinde adamnyń bógde bireýdiń kómegine qanshalyqty táýeldi ekenin anyqtaý máselesi pysyqtalady.
Bul úshin densaýlyq saqtaý jáne áleýmettik qorǵaý uıymdary arasynda aqparat almasý jolǵa qoıylyp, azamattardyń jeke qajettilikterin baǵalaý nátıjeleri eskeriledi. Sondaı-aq kórsetilgen qyzmetterdiń oryndalýyn baqylaý tetigi jetildirilmek. Munyń bári qoldanystaǵy tsıfrlyq júıelerdiń qyzmetin qaıtalamaı júzege asyrylýǵa tıis.
Aıta keteıik, buǵan deıin, elimizde qarttar sany eń kóp óńirlerdi jazǵan edik.
