Qarttardy aldaǵan alaıaq 4 jyl 7 aıǵa sottaldy
ASTANA.KAZINFORM — Qaraǵandy oblysynda egde jastaǵy azamattardy aldap, olardyń aqshasyn ıemdengen alaıaq sottaldy. Ózin jábirlenýshilerdiń shetelde turatyn týystary retinde tanystyryp, túrli syltaýmen aqsha alǵan kúdikti 10 zeınetkerge shyǵyn keltirgen. Sot ony kináli dep tanyp, 4 jyl 7 aı merzimge bas bostandyǵynan aıyrdy. Bul týraly Bas prokýratýra málim etti.
Qaraǵandy oblysynyń Álıhan Bókeıhan aýdanynyń prokýratýrasy Qazaqstan Respýblıkasy Qylmystyq kodeksiniń 190-baby 3-bóliginiń 4) tarmaǵymen aıyptalǵan azamatqa qatysty qylmystyq is boıynsha memlekettik aıyptaýdy qoldady.
— Sotta aıyptalýshynyń ınternet-resýrstardy paıdalana otyryp, egde jastaǵy azamattardyń baılanys derekterin anyqtap, olarǵa qońyraý shalyp, óziniń kim ekenin ashyp aıtpaı, áńgimelesýdi beıtarap sózderden bastaǵany anyqtaldy. Jábirlenýshiler qońyraý shalýshynyń kim ekenin anyqtaýǵa tyrysqan kezde, ózderi ony Qazaqstan Respýblıkasynan tys jerde turatyn týystary dep boljaǵan, — dep habarlady prokýratýradan.
Osy jaǵdaıdy paıdalanǵan aıyptalýshy jábirlenýshilerdiń jańylysqan pikirlerin qoldap, sálemdeme alý syltaýymen kýrer arqyly aqsha qarajatyn berýge kóndirgen, keıinnen aqshany ózi alyp ketip, oqıǵa ornynan boı tasalaǵan.
Qylmystyq árekettiń nátıjesinde 10 egde jastaǵy azamat jábirlenýshi dep tanyldy, olarǵa 50 myń teńgeden 1 mıllıon 750 myń teńgege deıingi mólsherde materıaldyq zalal keltirilgen.
— Qylmystyq isti qaraý qorytyndysy boıynsha sot aıyp taǵylǵan azamatty kináli dep tanyp, oǵan jazasyn ortasha qaýipsizdik mekemesinde óteýmen 4 jyl 7 aı merzimge bas bostandyǵynan aıyrý jazasyn taǵaıyndady, — delingen habarlamada.
Atalǵan úkim alaıaqtyq jasaǵany úshin qylmystyq jaýaptylyqtyń bultartpastyǵyn kórsetedi.
Prokýratýra azamattardy belgisiz adamdardan kelip túsetin telefon qońyraýlary kezinde qyraǵylyq tanytýǵa, alynǵan aqparatty týystary arqyly tekserýge jáne aqsha qarajatyn bógde adamdarǵa bermeýge shaqyrady.
Aıtra keteıik, Tarazda temirjol kassıri bılet satýdaǵy alaıaqtyǵy úshin jaza arqalady.
