Qarttar úıinen shyqqan koronavırýs: Barlyq qyzmetkerden synama alyndy

NUR-SULTAN. QazAqparat - QR Densaýlyq saqtaý mınıstrligi Qoǵamdyq densaýlyq departamentiniń dırektory Maǵrıpa Embergenova Aqmola oblysyndaǵy qarttar úıinen shyqqan koronavırýs jaǵdaıyna qatysty málimettermen bólisti, dep habarlaıdy QazAqparat tilshisi.

«Aqmola oblystyq áleýmettik baǵdarlamalardy úılestirý jáne jumyspen qamtý basqarmasynyń «Shapaǵat» arnaýly áleýmettik qyzmetter kórsetý ortalyǵy Tselınograd aýdanyna qarasty Aqqaıyń aýylyna ornalasqan. 16 naýryzda, karantın jarııalanǵan sátte bul ortalyqta qamqorlyqqa alynǵan 148 adam bolǵan.Orta jastary - 75 jasty quraıdy. Qyzmet kórsetetin 74 adamnyń ishinde 51 qyzmetker eńbek demalysyna jáne qashyqtan jumys isteýge jiberilgen. Ókinishke oraı, 2 sáýirde 1947 jyly dúnıege kelgen, al 6 sáýirde 1929 jyly dúnıege kelgen qamqorlyqqa alynǵan adam qaıtys boldy», - dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, qaza bolǵan eki adamnan da koronavırýs belgileri baıqalmaǵan. Olardyń indet juqtyrǵany qaıtys bolǵannan keıin anyqtalǵan.

«Joǵaryda aıtylǵan jaıttarǵa baılanysty Aqmola oblystyq taýarlar men qyzmetterdiń sapasyn jáne qaýipsizdigin baqylaý departamenti sanıtarlyq-epıdemıologııalyq tekserý júrgizip, baılanysta bolǵan adamdar aıasy anyqtaldy, koronavırýsty anyqtaýǵa arnalǵan zerthanalyq zertteýler júrgizildi. Vırýs juqtyrǵandarmen baılanysty bolýyna oraı ortalyqtyń barlyq qyzmetkerlerinen synama alyndy», - dedi Maǵrıpa Embergenova.