Qarttar úıine kelgen soń kózimnen jas, kókiregimnen sher ketpedi - qarııa
AQTÓBE. QazAqparat - Qarttar men múgedekter úıine kelgen Aǵıla Ámirova eki aıaǵyn jambasynan kestirgen. Balalary anasynyń kútimin jasaı almaǵan soń 4 aı buryn memlekettiń qamqorlyǵyna ótýge sheshim qabyldapty, dep habarlaıdy QazAqparat tilshisi.
Búgin Aqtóbe oblystyq qarttar men múgedekter úıinde merekelik kesh ótip jatyr. Stýdentter óz erkimen júre alatyn qarııalarǵa arnap kontsert qoıdy, olarmen birge bıledi. Qazirgi ýaqytta bul ınternat úıin barlyǵy 240 adam mekendegen. Olardyń teń jartysy múgedek. Qarttar úıine 4 aı buryn kelgen Aǵıla Ámirova bul sheshimdi qabyldaý óte qıyn bolǵanyn kózine jas alyp, aıtyp berdi.
«Ózim Aqtóbe oblysy Temir aýdany Altyqarasý aýylynda turdym. Saýatym joq, tek 7 klastyq bilimim bar. Ákem soǵysqa ketip, inimdi baqtym. Qazir jasym 83-ke keldi. Kúni-túni tylda eńbek etip, qara jumysty talǵamaı istegen edim. Shóp shabý, mal baǵý, sıyr saýyp, qyrmanǵa barý bizdiń negizgi jumysymyz boldy. Keýdemdegi tósbelgiler Jeńistiń 60, 70, 80 jyldyǵynda berildi. Qarttar úıine kelgenime 4 aı boldy. Qalada úıim boldy, biraq balalarym qartaıyp, baǵa almaıtyn kúıge tústi», - dedi Aǵıla Ámirov.
Qarııa úsh bala ósirgen. Eki qyzy, bir uly, nemere-shóbereleri de bar. Qazir jańa mekenge beıimdelip, jan-jaǵymen tanysyp jatyr.
«Ulym júregine ota jasap, múgedek boldy. Úlken qyzym 65 jasta, zeınetker. Al kishi qyzymnyń eki búıregi aýyrady. Meni kóterip, kútim jasaýǵa múmkindigi joq. Eki aıaǵymdy 6 jyl buryn kestirdim. Sebebi, qant dıabeti aýrýyna shaldyǵyp, jara shyǵyp, irińdaı bastady. Kún saıyn em alamyn, 6 ret ınsýlın beriledi. Qant assa, basymdy kótere almaı, tósekte jatamyn. Dıeta ustaý da múmkin emes. Bar tamaqty iship, jan saqtap otyrmyn. Dárigerlerge alǵys aıtamyn, kúni-túni kútim jasaıdy», - dedi qarııa.
«Balalarym baǵa almasa qaıda baramyn» dep kózine jas alǵan Aǵıla Ámirova qarttar úıine qonys aýdarý týraly sheshimdi qabyldap, eki aı boıy kózinen jas ketpegenin jasyrmady.
«Kókiregimnen sher, kózimnen jas ketpedi. Úıimdi tastap kelý ońaı emes. Qazir jańa ortaǵa úırenip kelemin. Menen de basqa adamdar bar, men jalǵyz emespin. Degenmen aýyl tamaǵyn saǵynamyn. Kelgen adamdarǵa «talqan, qaımaq ákelip ber» dep ótinish aıtamyn. Dıeta saqtap júrgen adamǵa bul taǵamdardy jeýge bolmaıdy. Biraq qurt pen irimshikti ańsaımyn, jasyryn saqtap, jep alamyn», - dedi Aǵıla Ámirova.
Qarııanyń balalary men týystary jaǵdaıyn bilip, kóńilin surap qarttar úıine keledi. Aqjarqyn ana balalaryna salmaq túsirmeıin, densaýlyqtary syr berdi dep, ózi sheshim qabyldady. Bul isine ókingen emes. 
