Qarttar merekesi Kanadada bir aı toılanady
ASTANA. QazAqparat. Kanadada qarııalar aıy bastaldy. Osy ýaqyt ishinde qarttarǵa barynsha kómek kórsetilip, olardyń zamandastarymen kezdesip, syrlasýyna jaǵdaı jasalady. Tipti kompıýter men ǵalamtordy paıdalanýdyń qyr-syry úıretilmek, dep habarlady www.24.kz.
Kanadada el turǵyndarynyń 15%-yn 65 jastan asqan egde jastaǵy jandar quraıdy. Osylaısha búginde qarttardyń qatary 5 mıllıonǵa jetken. Bul kórsetkish jyl saıyn ósip keledi. Mamandardyń aıtýynsha, endi 25 jyldan keıin Kanadadaǵy qarııalardyń qarasy taǵy eki esege ulǵaıýy múmkin.
- Biz Kanada qoǵamynyń basym bóligi egde jastaǵy adamdar ekendigin moıyndaýymyz kerek. Búgingi kúni olarǵa degen Úkimettiń nazary áli de jetkiliksiz. Mysaly, ata-analaryna balalary tarapynan jasalatyn zorlyq-zambylyq derekteri kóbine muqııat tekserilmeı, qalyp qoıady, - deıdi frantsýz tildi zeınetkerler federatsııasynyń prezıdenti Tereza Dorj.
Jergilikti Úkimet qoldaýy men egde jastaǵy adamdarǵa arnalǵan kóptegen memlekettik baǵdarlamalardyń baryna qaramastan, jasamys jandardyń jalǵyzbastylyǵy men olarǵa medıtsınalyq kómek kórsetý máselesi álige deıin óziniń ózektiligin joımaı keledi. Onyń ústine kanadalyq qarttardyń ózderine kórsetilgen qyzmetterdiń sapasyna kóńili kónshimeı júr.
Jylyna bir ret bolsa da qarttar merekesi kanadalyq ata-ájeler úshin óziniń úzeńgiles dos, syrlas zamandastarymen kezdesip, áńgime-dúken qurýdyń jalǵyz múmkindigi. Óıtkeni Kanadadaǵy turǵyn úılerdiń bir-birinen shalǵaı ornalasýynyń ózi - qarııalar úshin úlken másele.
