Qarttar kúnine oraı keńes: Deniń saý, shıraq bolý úshin ne isteý kerek
NUR-SULTAN. QazAqparat - Búgin — Halyqaralyq qarttar kúni. Osyǵan oraı QR Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy densaýlyqty qalaı saqtap, uzaq jyldar boıy qalaı qajyrly bolyp qalý jónindegi qarapaıym keńesterimen bólisedi, dep habarlaıdy QazAqparat.
Deneni shynyqtyryp, belsendi bolý. Taza aýada kóbirek qydyryńyz. Dene shynyqtyrý jattyǵýlary aǵzaǵa jaqsy áser etedi, qartaıý jyldamdyǵyn aıtarlyqtaı baıaýlatýǵa yqpal etedi, kúızelis jaǵdaıyn jeńýge kómektesedi. Jaımen ǵana júrýdiń ózi adamdy sharshata qoımaıdy, zat almasýdy, qan aınalymyn, tynys alýdy jaqsartady, bulshyq etterdi jattyqtyrady. Júrý kezinde júıke júıesi demalyp, adam sergip qalady.
Durys tamaqtaný. 50-60 jastan keıin aǵzada fızıologııalyq ózgerister bolady – zat almasý baıaýlaıdy, ishektiń jıyrylýy álsireıdi, fermentterdiń belsendiligi tómendeıdi. Eń bastysy, tamaqty az ishý kerek, biraq nárli zattar kóbirek bolýy qajet. Et ónimderin jeı bermeı, balyq, sút, ásirese qyshqyl sút ónimderin (aıran, ıogýrt) kóbirek jeý kerek. Kúnine 300-400 ml sút jáne túnge qaraı 200 ml aıran ishý usynylady.
Durys uıyqtaý. Durystap, qatty uıyqtaý úshin durys kún tártibi qajet: bir ýaqytta uıyqtaý, keshki asty uıqyǵa deıin 2-3 saǵattan keshiktirmeı, kóp jemeý kerek. Uıyqtar aldynda taza aýada qydyrǵan durys. Uıyqtar aldynda óte áserli teledıdar habarlaryn kórýge, aǵzany sergitetin sýsyndardy – qoıý shaı, kofe ishýge bolmaıdy.
Jaǵymsyz emotsııaǵa berilmeý. Jaǵymsyz emotsııalar: renish, úreı, sary ýaıymǵa salyný, ashý-yza, qaıǵyrý, qyzǵanysh, jek kórý qaýip-qater faktorlary bolyp sanalady, tezirek qartaıtyp, ómirdi qysqartady, jáne de kerisinshe, jaǵymdy emotsııalar – rahattaný, qýaný – aǵzanyń qýat alýyna kómektesedi. Kúlki – bul qýanýdyń, sergek kóńil-kúıdiń jáne rýhanı densaýlyqtyń belgisi. Ol ókpeniń qalypty jumys isteýine jaqsy yqpal etedi, zat almasýdy retteıdi.
Profılaktıkalyq tekserýden, skrınıngten ýaqytyly ótý. Skrıngtik tekserý arterııalyq gıpertonııany, júrektiń ıshemııalyq aýrýyn, qant dıabetin, glaýkomany, onkologııalyq aýrýlardy ýaqytyly anyqtaýǵa múmkindik beredi. Siz skrınıng týraly aqparatty emhanadaǵy ózińizdiń emdeýshi dárigerińizden bile alasyz.
Bul qaǵıdalardy saqtaý arqyly belsendi bolýǵa, densaýlyǵyńyzdyń myqty bolýyna jáne uzaq jyldar boıy denińizdiń saý bolýyna kómektesedi!
