Qarttar kúnine oraı 60 myńǵa jýyq astanalyq zeınetkerge materıaldyq kómek kórsetiledi
ASTANA. QazAqparat - Jyl saıyn 1 qazanda Qazaqstanda Halyqaralyq qarttar kúni atalyp ótedi. Astana qalasy Jumyspen qamtý jáne áleýmettik baǵdarlamalar basqarmasynyń habarlaýynsha, elordanyń 58 myń zeınetkerine (eń tómen mólsherdegi zeınetaqy alýshylardan basqa) jergilikti bıýdjet qarajaty esebinen 5 myń teńge mólsherinde bir rettik materıaldyq kómek kórsetiledi, dep habarlady qalalyq ákimdiktiń baspasóz qyzmetinen.
Sondaı-aq, 1 qazanda Ardagerler uıymynyń belsendileri UOS ardagerleriniń, zeınetkerlerdiń úılerin aralaıdy. Qarttar kúnine oraı «Almaty» aýdanynyń ákimdigi aýdanǵa qarasty Ardagerler uıymy jáne kásipkerlermen birlesip 150 zeınetkerge, sonyń ishinde UOS jáne tyl eńbekkerlerine arnap qaıyrymdylyq as beredi. Budan bólek, 1 qazanda Qarttar men múgedekterge arnalǵan medıtsınalyq-áleýmettik mekemede 270 zeınetkerge shıpajaılyq-kýrorttyq emdelý qyzmeti kórsetiledi. Sondaı-aq, Qarttar kúnine oraılastyrǵan birqatar sporttyq sharalar uıymdastyrylady. Bul kúni shahmat, doıby, toǵyzqumalaq jáne basqa da halyq oıyndarynan shaǵyn ortalyqtarda jarystar ótkiziledi. Qazannyń 1 kúni «Jastar» saraıynyń kınokontserttik zalynda, saǵat 19.00-de elordanyń UOS ardagerleri men zeınetkerlerine arnalǵan merekelik kontsert ótedi.
