Qarttar kúni: SQO-da aýyl zeınetkerleriniń spartakıadasy ótti
PETROPAVL. QazAqparat – Soltústik Qazaqstan oblysynda Qarttar kúnine oraı aýyldyq okrýgter zeınetkerleriniń arasynda spartakıada ótti, dep habarlaıdy QazAqparat tilshisi.
Qyzyljar aýdany Beskól aýylynda zeınetkerler arasynda ótken spartakıada – dástúrli. Byltyr indetke baılanysty kezdese almaǵan ata-ájeler, bul spartakıadany asyǵa kútken eken. Ardagerler keńesi uıymdastyrǵan is-sharaǵa aýdandaǵy 19 aýyldyq okrýg zeınetkerleri óz komandasyn ákelgen. Olar shahmat, toǵyzqumalaq, ústel tennısi, doıby jáne darts sııaqty sport túrlerinen jarysty.
Jetpisbaı Bazylov Roşınskoe eldi mekeniniń turǵyny. Zeınetker spartakıadaǵa toǵyzqumalaq oınaý úshin kelipti.
«Toǵyzqumalaqty toqsanynshy jyldary úırendim, oǵan deıin bul oıyndy bilmedik qoı. Qazir nemerelerimdi baýlyp júrmin. Spartakıadaǵa qýana-qýana keldim. Іndetke baılanysty eshqaıda shyǵa almaı qaldyq qoı. Búgin qanshama tanys-joldastardy kórip, sergip qaldym», - deıdi aýyl turǵyny.
Qyzyljar aýdanynda ǵana 9 myńnan astam zeınetker bar, sonyń 2 myńy Beskól aýylynda turady. Bıyl aýdan ortalyǵynan úsh komanda qatysýǵa ótinish bildirdi, olardyń ekeýi – bilim berý jáne quqyq qorǵaý organdarynyń zeınetkerlerinen qurylǵan.
«Spartakıadaǵa zeınetkerlerimiz aldyn ala daıyndalady, kútedi. Bul – olar úshin úlken mereke. Dastarhan jaıyp, sháı ázirledik. Túski as beremiz. Kontsert daıyndadyq. Desek te, pandemııaǵa baılanysty bıyl qatysýshylardyń sany jyldaǵydan eki ese az, saqtyq sharalaryn ustanýǵa týra kelip otyr. Búgingi jeńimpazdarǵa, spartakıadaǵa qatysýshylarǵa syılyqtarymyz bar. Eshqaısy eskerýsiz qalmaıdy», - deıdi Qyzyljar aýdandyq ardagerler keńesiniń tóraǵasy Boranbaı Qojahmetov.
