Qarttar kúni qarsańynda elordalyq 51 myńnan astam zeınetkerge materıaldyq kómek kórsetiledi
ASTANA. QazAqparat - Astanada jyl saıynǵy dástúr boıynsha Qarttar kúnin merekeleý aıasynda 51 879 muqtaj zeınetker jergilikti bıýdjet esebinen bir rettik aqshalaı tólem alady, dep habarlaıdy Astana qalasy ákimdiginiń baspasóz qyzmetinen.
Sonymen qatar «Esil» aýdanynyń Prıgorodnyı aýylynyń 40 zeınetkeri, «Almaty» jáne «Saryarqa» aýdandarynyń az qamtylǵan jáne jalǵyzbasty 800 zeınetkeri azyq-túlikpen qamtamasyz etiledi. Osy kúnderi elordanyń ardagerler tobynyń belsendileri, qalanyń 680 zeınetkeri, sonyń ishinde Uly Otan soǵysynyń ardagerleri, eńbek jáne tyl ardagerleri úshin qaıyrymdylyq túski astary uıymdastyrylady. Syılyqtar men materıaldyq kómekten bólek, az qamtylǵan jáne jalǵyzbasty 20 zeınetker qatty otynmen qamtamasyz etiledi.
Sondaı-aq Qarttar kúnin merekeleý aıasynda qalanyń barlyq uıymdary men kásiporyndary eńbek ardagerlerin, uıymdardyń jasy egde tartqan azamattary men burynǵy qyzmetkerlerin qurmettep, elordanyń azyq-túlik dúkenderinde qarttar úshin aktsııalar ótedi. Onda azyq-túlik taýarlary úshin jeńildikter jasalady.
