Qarttar kúni: Bloger ájeniń belsendi ómiri
ASTANA. KAZINFORM – Qarttar kúni qarsańynda belsendi ómir saltyn ustanyp, áleýmettik jelide kúndelikti tirshiligin kórsetip júrgen Oral qalasynyń turǵyny Jumaǵyz Bımaǵanbetova Jibek Joly telearnasynyń «Búgin.LIVE» baǵdarlamasyna suhbat berdi. Jasy ulǵaıǵanyna qaramastan, ol tańǵy saǵat 5-te turyp, kún saıyn 10 myń qadam júredi, jattyǵý jasaıdy jáne vıdeolaryn ózi túsirip, óńdep, áleýmettik jelige jarııalaıdy.
Jumaǵyz Bımaǵanbetova blog júrgizýdi bıyl qyrkúıekte bastaǵan. Buǵan deıin de áleýmettik jelige kúndelikti ómirin túsirip júrgen ol mamandarmen baılanysyp, belsendi ómir saltyn nasıhattaıtyn jeke blogyn damytýǵa kirisken.
– 8 qyrkúıekten bastap blog júrgize bastadym. Al 28 shildeden bastap kúndelikti júre bastadym. Mamandar habarlasyp, qalaı júretinimdi, ne isteıtinimdi, kúndelikti ómirimdi kórsetsem degen usynys aıtty. Jastarǵa, aıaǵy, júregi aýyratyn adamdarǵa kúndelikti qozǵalystyń qandaı nátıje beretinin aıtqym keldi. Sodan beri ózim júrip, jattyǵý jasap, bárin áleýmettik jelige salyp otyrmyn, – deıdi ol.
Onyń ádettegi kúni tańǵy besten bastalady. Alty jarym, jetige deıin 10 myń qadam júrýge tyrysady. Telefonyndaǵy qadam sanaǵysh arqyly júrisin baqylap otyrady. Úıge qaıtar jolda jattyǵý jasap, keıin nemeresin mektepke shyǵaryp salady. Onyń aıtýynsha, tańǵy qozǵalys kún boıyndaǵy sergektigine áser etedi.
– Tańerteń júrgenimniń arqasynda keshke deıin kúsh-qýat bolady. Tańerteń aýa da basqasha, mıyń da demalady. Buryn eki aıaǵym keshke qaraı syrqyrap aýyratyn. Qazir tórtinshi qabatta turamyn, tórtinshi qabatqa júgirip shyǵyp júrmin. Úıge terlep kelemin. Keıde beltemirde (týrnık) de asylamyn, – deıdi bloger áje.
Jumaǵyz Bımaǵanbetova úshin áleýmettik jelige kontent jasaý da kúndelikti ádetke aınalǵan. Vıdeony túsirý, óńdeý jáne jarııalaý jumystaryn ózi atqarady. Bul iske arnaıy kýrs oqyp, qajetti daǵdylardy óz betimen meńgergen.
– Vıdeony óńdeý, ony salý – bárin ózim jasaımyn. Balalarym tipti blog júrgizetinimdi bilmeıdi. Ózim kýrs alyp, ózim úırendim. Qalaı isteımin, solaı salamyn, – deıdi ol.
Belsendi ómir salty keıipkerdiń ómirindegi alǵashqy bastama emes. Jumaǵyz Bımaǵanbetova jastyq shaǵynda aýylda komsomol hatshysy bolǵan. Keıin munaı bazasynda meńgerýshi qyzmetin atqaryp, aýyl sharýashylyǵy salasynda da eńbek etken. Balalaryn qalada oqytyp, keıin nemerelerin tárbıeleýge kóńil bólgen.
Qazir úlken nemeresi 17 jasta, al kenje nemeresi eki aılyq. Jalpy bloger áje 16 jyldan beri nemere tárbıelep keledi.
– Balalarymdy qalada oqyttym. 48 jasymda nemere baǵyp qaldym. Qazir 16 jyl boldy nemere baǵyp otyrǵanyma. Sodan keıin óz ómirimde istelmeı qalǵan dúnıeler bar sııaqty sezindim. Sony ózim qolǵa alyp jatyrmyn, – deıdi Jumaǵyz Bımaǵanbetova.
Ol sońǵy ýaqytta tamaqtanýyna da kóńil bóle bastaǵanyn aıtady. Bir aı ishinde 10 keli salmaq tastaǵan.
– Bir aıda 10 keli tastadym. Onyń eshqandaı qupııasy joq. Birinshiden, 10 myń qadam júremin. Buryn aq nan men qaımaqty úsh mezgil jeıtinmin. Nandy óte jaqsy kóremin. Qazir aq nandy alyp tastadym, qara nan jeımin. Táttilerdi de qoıdym. Qantqa baılanysty jeýge bolmaıtyn taǵamdardyń bárin alyp tastadym, – deıdi ol.
Keıipkerdiń aıtýynsha, onyń 2-shi tıpti qant dıabeti bar. Qazir densaýlyǵyna erekshe mán berip, fızıkalyq belsendiligin arttyrǵan. Insýlın qoldanýdy toqtatqanyn da aıtady. Alaıda mundaı jaǵdaıda dári-dármek mólsherin nemese emdeý tásilin dárigerdiń keńesinsiz ózgertýge bolmaıdy.
Jumaǵyz Bımaǵanbetova blog júrgizýdi densaýlyǵyn kútýge ǵana emes, aldaǵy josparlaryna da baılanystyrady. Ol shetelge saıahattap, nemerelerine kómektesetin jaǵdaıǵa jetýdi armandaıdy. Jumaǵyz Bımaǵanbetova úshin zeınet jasy buryn keıinge qaldyrylǵan isterge qaıta oralatyn kezeńge aınalǵan.
Aıta keteıik, buǵan deıin, qarttar kúnine oraı 274 myń adamǵa 3,8 mlrd teńge kómek kórsetiletinin jazǵan edik.
