Qarttar kúni: Astanadaǵy soǵys jáne eńbek ardagerlerine qurmet kórsetildi
ASTANA. KAZINFORM - Qarttar kúni qarsańynda QR PІB qurylymynyń vedomstvolyq baǵynysty kásiporyndarynyń qyzmetkerleri uzaq jyl jemisti qyzmet atqarǵan, qazirgi tańda zeınet jasyna jetken áriptesteriniń, sondaı-aq soǵys ardagerleri men tyl eńbekkerleriniń úıine baryp, qurmet kórsetti.
«Qazqurylysjúıesi» JShS ujymynyń ókilderi 101 jastaǵy ІІ Dúnıejúzilik soǵys ardageri Rzaǵul Baıkeshevke zor qýanysh syılady. Ǵasyrdan astam ýaqyt jasaǵan qarııaǵa syı-sııapat jasap, shaǵyn kontsert uıymdastyryldy. Ardager qýanyshtan kózine jas alyp, ónerpazdardyń ónerin tamashalady. Ánshi jigit aqsaqaldyń ótinishi boıynsha jastyq shaǵy týraly ánderdi shyrqady.
Rzaǵul aǵa 1943 jyly maıdanǵa attanǵan. Polsha, Rýmynııa jáne Vengrııa jerin azat etken, Rjev qalasynyń mańyndaǵy shaıqastarǵa, Velıkolýk shabýyly operatsııasyna qatysqan. Ardager áli de tyń, jadyn joǵaltpaǵan, kún saıyn serýendegendi unatady.
QR Prezıdenti Ákimshiligi men Úkimetiniń ákimshilik ǵımarattary dırektsııasynyń qyzmetkerleri Uly Otan soǵysynyń ardageri 98 jastaǵy Vasılıı Antonovıch Serdıýkovtiń úıine arnaıy bardy. Ardager úıine qonaq kelgendi jaqsy kóredi. Tól merekesine oraı, ujym atynan kadr qyzmetiniń ókilderi ardagerge saýda jelileriniń sertıfıkaty men tátti syılyqtar tabystady.
«MTQB ákimshilik ǵımarattar dırektsııasy» RMK kásipornynyń ujymy kezinde jemisti eńbek etip, búginde qurmetti eńbek demalysyna shyqqan 12 zeınetkerge, sondaı-aq ózge de tyl eńbekkerlerine gúl jáne basqa da syı-sııapat jasady. Qoshemet kórsetilgenderdiń qatarynda tyl ardagerleri – 1935 jyly týǵan Tursyn Maǵzumqyzy Meńdiqulova men 1937 jyly týǵan Haıdar Amantaıuly Meńdiqulov bar. Olar búldirshin shaǵynan analarymen birge kolhoz egistikterinde jumys istegen, balalyq shaǵyn soǵys urlaǵan.
«MTQB Avtosharýashylyǵy» RMK ujymy zeınet jasyndaǵy 30 eńbek ardagerine dastarhan jaıdy. Jas júrgizýshiler aǵa býyn ókilderine kontsert qoıyp, syılyqtar berdi. Ardagerler arhıv fotosýretteri qoıylǵan qabyrǵa gazetin kórip, erekshe áser aldy. Qabyrǵa gazetinde olardyń boıynda kúshi tasyǵan jas kezderindegi, jumys mezetterindegi kadrlar kórinis tapqan-dy.
Dastarhan basynda ádemi áńgime aıtyldy. Eńbek ardagerleri elordadan Astanaǵa kóshken tustaǵy kezeń men Avtosharýashylyq qurylǵan kezdegi qıyndyqtardy eske alyp, jumystaǵy qyzyqty oqıǵalar týraly baıandady. MTQB Avtosharýashylyǵyndaǵy osyndaı kezdesýler dástúrli túrde ótip turatynyn aıta ketken jón.
«MTQB Injenerlik ortalyǵy» RMK qyzmetkerleri ózderiniń 8 eńbek ardagerine arnap mádenı is-shara uıymdastyrǵandy jón kóripti. Sóıtip, barlyǵyn «Astana opera» teatryndaǵy «Bahshasaraı fontany» baletine shaqyryp, qushaqtaryn gúlge toltyrdy.
Al «Materıaldyq-tehnıkalyq qamtamasyz etý basqarmasy» Memlekettik mekemesiniń 10 zeınetkeri ujym ókilderin árqaısysy óz úıinde qarsy aldy. Mol dastarhan jaıyp, jańalyqtaryn jetkizdi.
«Men 78-ge keldim. Zeınetke shyqqaly jyl saıyn áriptesterim keledi. Ujymnyń kóp jyldyq eńbegimizdi, ortaq iske qosqan úlesimizdi baǵalaıtyny qýantady. Osyndaı jaǵdaıda kásiporyn týraly kóp jańalyqtardan qanyǵyp qalasyń. Úlken ujymnyń múshesi bolǵanymdy seziný, sizderdiń qamqorlyqtaryńyz ben qoshemetterińizdi kórý men úshin úlken qýanysh. Kóp rahmet», - degen Sapıolla Joldasbekuly Musaqanov qımaı qoshtasty.
