«Kartop - qytaıdiki, alma - ırandiki, qııar - ózbektiki. Qazaq sonda ne ósiredi?» - respýblıkalyq basylymdarǵa sholý

«Qazaqstan Respýblıkasynyń Premer-Mınıstri Kárim Másimov mamyrdyń 21-inde Sankt-Peterbýrg qalasyna keldi. Munda Eýrazııalyq ekonomıkalyq qoǵamdastyqqa múshe elder (EýrAzEQ) Memleketaralyq keńesiniń Úkimet basshylary deńgeıindegi jáne Táýelsiz Memleketter Dostastyǵyna múshe (TMD) elder Úkimet basshylary keńesiniń otyrystary bolyp ótti», dep jazady «Egemen Qazaqstan» gazeti «Yntymaqtastyq ónegesiniń ómirsheńdigi» atty maqalasynda. Jarııalanymda atalǵan otyrysty ashqan Reseı Federatsııasy Úkimetiniń Tóraǵasy Vladımır Pýtınniń «EýrAzEQ aıasynda ıntegratsııalanýdyń eń joǵarǵy satysy - Keden odaǵy sátti bastaý aldy. Biz qazir Keden odaǵynyń kedendik tarıfterin sáıkestendiretin alǵashqy kezeńdi bastan ótkerip jatyrmyz. Al 1 shildeden bastap táýelsiz úsh memlekettiń halqy biryńǵaı kedendik keńistikte ómir súretin ekinshi kezeńge aıaq basatyn bolamyz», degen sózi keltirilgen.

«Egemen Qazaqstan» gazetiniń habarlaýynsha, Qorǵanys mınıstri Ádilbek Jaqsybekov Túrik Respýblıkasy Bas shtabynyń bastyǵy, armııa generaly Ilker Bashbýgpen kezdesken. Kezdesý barysynda taraptar áskerı jáne áskerı-tehnıkalyq saladaǵy qarym-qatynastardyń damý qarqynyna qanaǵattanarlyq nıet bildirgen. «Áriptestiktiń negizgi baǵyttary elimizdiń áskerı qyzmetshilerin Túrkııanyń áskerı oqý oryndarynda oqytý, qazaqstandyq arnaıy maqsattaǵy bólimshelerdi daıyndaý men olardy jaraqtandyrý, Qazaqstan Respýblıkasy Qarýly Kúshterin reformalaý úderisine járdem kórsetý bolyp tabylady. Qazirgi tańda Qazaqstan Qorǵanys mınıstri men Túrik Bas shtaby bastyǵynyń ótken jylǵy kúzde Ankaradaǵy kezdesýinde qol jetkizilgen negizgi kelisimderi júzege asyrylýda. Búginge deıin túrik áskerı mamandarynyń kómegimen «Komandos», «Arnaıy maqsat», «Mergender daıyndaý», «Іshki qaýipsizdik» baǵdarlamalary boıynsha 500-den astam qazaqstandyq áskerı qyzmetshi daıyndyqtan ótti. 2007 jyldan beri Aeroutqyr áskerleriniń arnaıy maqsattaǵy bólimsheleriniń 400 jaýyngeri «Komandos»" kýrsy boıynsha tájirıbeden ótti», dep jazady basylym.

Osy basylymnyń «Parlament» arnaýly betinde birneshe maqalalar toptamasy jarııalandy. Májilis depýtaty Qurmanǵalı Ýálıdiń Úkimet basshysyna joldaǵan saýalynda Qytaıda turatyn qazaqtarǵa, jalpy az ulttarǵa jeńildik jasaý arqyly qytaılandyrý saıasaty keńinen júrgizilip kele jatqandyǵy baıandalǵan. «Máselen, qazaq jıi qonystanǵan aýyl-aýdandardaǵy qazaqtardy Qytaı ulty shoǵyrlanǵan aýyl-aýdandarǵa kóshirip aparyp, birtindep sińirip, tegin egistik jer, baspana salyp berip, túrli jeńildikter jasaý arqyly olardy baıytýǵa kúsh salyp jatyr, bul saıasat nátıjesin de bere bastady. Sonymen qatar, turmysy tómen otbasylarynyń balalaryn qazaq kóp qonystanǵan ShUAR-dan ortalyqtaǵy qalalardyń JOO-laryna tegin oqytyp, ýnıversıtet bitirgennen keıin memlekettik qyzmetker retinde jumysqa alýda. JOO-larǵa az ult jastaryn qabyldaýda qytaılyqtarǵa qaraǵanda kóbirek qyzyqtyrý úshin 30%-40% jeńildik jasalǵan», delingen depýtat saýalynda.

***

«Tasqynnan taǵy qaýip tónip tur». Osy taqyryppen «Alash aınasy» gazetinde jaryq kórgen maqalada aldaǵy táýlikterde elimizdiń Almaty jáne Shyǵys Qazaqstan oblystarynda nóser jańbyr jaýyp, sonyń saldarynan ózen-sýlar arnasynan tasyp, sel júrý qaýpi bar ekendigi jazylǵan. Gıdrometeorologterdiń boljamyna sáıkes jaýyn-shashynnyń mol túsýi saldarynan mamyrdyń 22-si kúni Almaty oblysyndaǵy ózenderdiń deńgeıi kóterilip, arnasynan asýy yqtımal.

Búgingi nómirin sport taqyrybyna arnaǵan «Alash aınasy» gazetinde qazaq halqynyń ulttyq sport ónerine qatysty birqatar maqalalar toptamasy jarııalanǵan. Sonymen qatar «Oı-kókpar» aıdarynda da bilikti mamandarǵa «Qazirgideı kózqaraspen qazaq kúresin Azııa oıyndarynyń baǵdarlamasyna engize alamyz ba?» degen saýal qoıypty. Osy saýalǵa jaýap bergen Dúnıejúzilik qazaq kúresi federatsııasynyń prezıdenti Serik Tókeev pen Qazaq sport jáne týrızm akademııasynyń prorektory Elemes Álimhanulynyń bir-birine qarsy pikirlerin basylymnyń senbilik nómirinen oqı alasyzdar.

«Alash aınasy» gazetiniń «Dat!» aıdarynda Halyqaralyq jáne QR toǵyzqumalaq qaýymdastyǵynyń tóraǵasy Álıhan Baımenovpen aradaǵy suhbat «Toǵyzqumalaq jarysynda utatyn - qazaqtyń zııatkerligi men qazaqtyń mádenıeti» degen taqyryppen berilgen. Ekýeara áńgime barysynda ol «toǵyzqumalaq túrki halyqtaryn biriktirý isine óz úlesin qosa alatyn zııatkerlik oıyn bolady dep oılaımyn. Sondyqtan biz túrki dúnıesi akademııasy jumysyna osy toǵyzqumalaqty qosqymyz keledi», depti.

***

«Bıyl UBT synaqtary jetinshi márte ótkizgeli jatyr. Bir dókeı kókemizdiń: «alǵashqy bes jyldan aman shyqqan jobanyń ǵumyry uza-aaq bolady» degen sózi bar edi, sirá, testileýdiń bul túri mektep bitirýshilerdi «ótkelekten» ótkizýdiń uzaq merzimdi tásiline aınalatyn shyǵar. Alǵashqy jyldardaǵydaı emes, test alýshylar da, tapsyrýshylar da bul iske ábden mamandanyp aldy. Qup delik. Alaıda mamandanyp úlgergen taǵy bir top bar. Ol -UBT-ny bıznes kózine aınaldyryp alǵandar», dep jazady «Aıqyn» gazeti. Atalǵan jaıtqa taldaý jasalyp jazylǵan jarııalanymdy basylymnyń senbilik nómirinde basylǵan «UBT bıznes kózine aınalyp barady» degen maqaladan oqı alasyzdar.

«Kartop - qytaıdiki, alma - ırandiki, qııar - ózbektiki. Qazaq sonda ne ósiredi?». «Aıqyn» gazetinde osy taqyryppen jaryq kórgen maqalada qunarly jerimizdiń keń baıtaqtyǵyna qaramastan jemis-jıdektiń, kókónistiń elimizge kórshi elderden tasymaldanyp otyrǵandyǵyna qynjylys bildirilgen. «Biz tap bir soltústik polıste turatyn sekildimiz. Qazaqstannyń geografııalyq jaǵdaıynan beıhabar týrıst eger kók bazarǵa barsa, týra osylaı oılar edi. Óıtkeni ondaǵy alma Irannan, kartop pen pomıdor Qytaıdan, al qııar men kapýsta Ózbekstannan. Sonda bizde ne ósiredi?», dep jazady basylym.

***

«Astana aqshamy» gazetiniń aıqara betinde sýretshi, Memlekettik syılyqtyń laýreaty Erbolat Tólepbaımen aradaǵy suhbat «Óz eńbekterimniń qandaı ekenin ózim de áli túsine bermeımin» degen taqyryppen berilgen. Ekeýara áńgime barysynda qylqalam sheberi «menińshe, óner shynaıy jáne shynaıy emes bolyp bólinedi. Eger men óz ónerimdi shynaıy desem, artyqtaý bolar edi. Óıtkeni, ony kórermen aıtýy kerek. Al shynaıy ónerdiń eń birinshi alǵysharty - esepsiz jasalýy», degen pikirin bildire ketken.

***

«Kazahstanskaıa pravda» gazetiniń senbilik nómirinde Grýzııanyń burynǵy prezıdenti Edýard Shevardnadzemen aradaǵy suhbat jaryq kórdi. Ekýara áńgime barysynda ol «Biz Nursultan Ábishulymen planetamyzdaǵy álemde jıyrma birinshi ǵasyrdyń mejesinde túbirli ózgeristerdiń, men aıtar edim, tektonıkalyq yǵyspalardyń kýágeri bolý mańdaıyna jazylǵan urpaqtardyń qataryna qosylamyz. Bostandyqpen birge bizdiń qolymyzǵa onyń saldarlary da tıdi. Kóptegen jerlerde keıde syrttan jaǵylǵan qaqtyǵys oshaqtarynyń oty paıda boldy. Búkil álemge qater tóndirip turǵan agressııashyl separatızm adamdarǵa, sonyń ishinde meniń halqyma da san jetkisiz aýyrtpalyq alyp keldi. Ádilettilik pen Grýzııanyń terrıtorııalyq tutastyǵyn qalpyna keltirý jolyndaǵy beıbit jáne saıası quraldarmen júrgizip jatqan kúresimizde biz dáıim dostarymyz tarapynan qoldaýdy sezinýdemiz. Bul iste qurmetti Nursultan Ábishulynyń jeke basynyń rólin aıryqsha ataǵym keledi, óıtkeni agressııashyl separatızmdi aıyptaıtyn birlesken Deklaratsııa TMD elderi basshylarynyń dál Almaty sammıtinde tuńǵysh ret qabyldanǵan bolatyn», degen.