Kartop, kókónis jáne jemis-jıdek qoımalarynyń syıymdylyǵy ónim kóleminen 4 ese az

ASTANA. KAZINFORM – Elimizde kartop, kókónis jáne jemis-jıdek saqtaıtyn oryndardyń jalpy syıymdylyǵy 2 371 500 myń tonna. Bul týraly Kazinform agenttiginiń resmı saýalyna Aýyl sharýashylyǵy mınıstrligi joldaǵan resmı jaýapta aıtylǵan.

— Aýyl sharýashylyǵy mınıstrligi jergilikti atqarýshy organdarmen birlesip, 2023-2025 jyldarǵa arnalǵan kókónis qoımalaryn salý jáne jańǵyrtý jónindegi keshendi jospardy iske asyryp jatyr. Búgingi kúni respýblıka boıynsha jalpy saqtaý syıymdylyǵy 2 371,5 myń tonna bolatyn kartop, kókónis pen jemis-jıdek saqtaıtyn 964 nysan bar, - delingen habarlamada.

Vedomstvo deregine saı, 2024 jyldyń qorytyndysy boıynsha saqtaý syıymdylyǵy 166,2 myń tonna bolatyn 27 nysan salyndy. Al 2023 jyly syıymdylyǵy 292,7 myń tonnany quraıtyn 35 joba iske asyrylǵan. 2025 jyly jalpy syıymdylyǵy 140,5 myń tonna bolatyn 23 jobany iske asyrý josparlanǵan.

Bıylǵy josparlanǵan jobalar sátti iske qosylǵan kúnniń ózinde eldegi mundaı qoımalardyń syıymdylyǵy 2,5 mln tonnadan sál asady. Al byltyr elimizde 2,9 mln tonna kartop, 3,9 mln tonna kókónis jáne 2,6 mln tonna baqsha daqyldary, ıaǵnı osy sanatta 9,4 mln tonna ónim jınaldy. Bul sandardan elimizde mundaı ónim kólemi men saqtaý qoımalary syıymdylyǵy arasyndaǵy alshaqtyq 4 esege jýyqtaıtynyn ańǵarýǵa bolady.