Kartop eksporty sáýir aıyna deıin kvota boıynsha retteledi
Mınıstrliktiń baspasóz qyzmeti usynǵan málimet boıynsha, Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysynda atalmysh usynys qoldaý tapqan.
«Azyq-túlik taýarlarynyń tutyný normalary boıynsha halyqtyń qajettiligin qamtamasyz etý úshin 629,3 myń tonna kartop qajet. 2021 jylǵy kartop óndirisiniń kólemi 4mln 034,7 myń tonna bolǵan. Sáýir aıyna deıingi kezeń kartop saqtaýǵa qolaıly mezgil bolǵandyqtan 144,5 myń tonna kartopty kvota boıynsha eksporttaýǵa ruqsat berilip otyr. Bul aı saıyn 48,2 myń tonna katorpty syrtqa satýǵa múmkindik beredi», - dep jazylǵan mınıstrliktiń málimetinde.
Degenmen vedomstvo kartopty eksporttaýshylarǵa mynadaı talaptar qoıý qarastyrylýda:
- kartopty arnaıy saqtaý obektilerinde saqtalatyn kartoptyń bolýyn rastaý (kartoptyń jalpy kólemin jáne kókónis-kartop qoımasynyń mekenjaıyn kórsete otyryp);
- eksporttyq kólemge teń kartopty ishki naryqqa ótkizý boıynsha mindetteme qabyldaý;
- kartoptyń ishki satý baǵalaryn deńgeıde bekitý.
«Bul rette, kartop baǵasynyń negizinen satý kezinde ósetinin atap ótemiz. Máselen, aýylsharýashylyq taýar óndirýshiler ortasha kóterme saýdada tonnasyna 120 myń teńgemen beredi. Al bólshek saýda dúkenderinde kartop baǵasy kelisine 200-220 teńge bolyp otyr. Osylaısha, QR Básekelestikti qorǵaý jáne damytý agenttigi men QR Saýda jáne ıntegratsııa mınıstrligi tarapynan baǵa belgileý jáne saýda ústemelerin qatań baqylaýdy qamtamasyz etý talap etiledi», - delingen AShM málimetinde.
