Kartop eksportyna shekteý. Túrkistandaǵy shekara beketterinde baqylaý kúsheıtildi

TÚRKІSTAN. KAZINFORM — Óńirde shtab qurylyp, shekara aımaqtary baqylaýǵa alyndy.

Túrkistan oblysynyń barlyq keden beketterindegi karantın ınspektorlaryna jáne aýdandyq ınspektsııa qyzmetkerlerine kartop eksportyna engizilgen shekteýler eskertilip, baqylaý kúsheıtildi.

Oblys ákiminiń orynbasary Nurbol Turashbekov Saryaǵash temirjol stantsııasynda vedostvoaralyq májilis ótkizip, shtab mindetterin belgiledi. «Qazyǵurt» keden beketinde shekarashylarmen kezdesip, qadamdyq josparmen tanystyrdy. 

Jalpy óńirde áleýmettik mańyzy bar azyq-túlikpen qamtamasyz etý maqsatynda «Túrkistan áleýmettik kásipkerlik korporatsııasy» AQ-nyń turaqtandyrý qory jumys isteıdi. Turaqtandyrý qorynda 4 309 tonna kartop ónimimen forvartyq kelisimshart jasalǵan. 

19 qańtardaǵy jaǵdaı boıynsha turaqtandyrý qorynyń qoımasynda 110 tonna, sharýa qojalyqtarynyń qoımasynda 3 541 tonna kartop saqtaýly tur. Bul qor 3 aıǵa qajettilikti qamtamasyz etedi. 

— QR Saýda jáne ıntegratsııa mınıstrligine Pákistan Respýblıkasynan tasymaldaýǵa erte pisetin kartop ónimine aqpan aıynan bastap ar aıǵa 500 tonnadan (4 aıǵa 2000 tn) ótinim berilgen. Bıylǵy boljam boıynsha óńirimizde erte pisetin kartop (mamyr, maýsym, shilde) 6 844,4 ga ornalastyrylyp, odan 186,3 myń tonna ónim jınaý josparlanǵan. Bul óz kezeginde mamyr aıynan bastap óńir turǵyndary men basqa oblys halqyn erte pisetin kartoppen qamtamasyz etýge múmkindik beredi, — delingen Túrkistan oblysy ákimdiginiń baspasóz qyzmeti taratqan aqparatta.

Aıta keteıik, ishki naryqtaǵy kartop baǵasyn turaqtandyrý maqsatynda, 2025 jylǵy 18 qańtarda ótken Saýda qyzmeti máseleleri jónindegi vedomstvoaralyq komıssııa otyrysynda kartopty úshinshi elderge áketýdi 6 aı merzimge shekteý týraly sheshim qabyldandy.

Al, aýyl sharýashylyǵy mınıstrligi kartop qory ishki qajettilikti tolyq qamtamasyz etýge jetkilikti ekendigin málimdegen bolatyn.