Kartop baǵasynyń ósýine jol bermeý úshin ne isteledi - mınıstr jaýaby

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov aldaǵy ýaqytta kartop baǵasynyń ósýine jol bermeý úshin qandaı qadamdar jasalatynyn aıtty. Mınıstrdiń paıymynsha, bul máselede memlekettik ári jergilikti atqarýshy organdar, bıznes qoǵamdastyq, sondaı-aq fermerler ózara is-qımylda jumys istese, naqty nátıje bolady, dep habarlaıdy QazAqparat tilshisi.

«Qazirgi kezde bul qoǵam men bıznesti alańdatyp otyrǵan ózekti másele. Ásirese, áleýmettik jelilerde syn aıtylyp jatyr. Biraq naryqta qalyptasqan bul jaǵdaı usynys pen suranys teńgeriminiń jáne óńirler arasyndaǵy kókónis ónimderi boıynsha saýda qatynastarynyń úzilýine baılanysty týyndap otyr. Mundaı jaǵdaıdy bizde ǵana emes, kórshiles elderde de kórip otyrmyz», - dep toqtaldy B. Sultanov onlaın rejımde halyq aldynda esep berýi kezinde.

Onyń aıtýynsha, Reseıde suranys artyp otyr. Sondyqtan elimizde kartop baǵasynyń sharyqtaýyna jol bermes úshin tıisti aqparattyq júıelerdiń múmkindigi nazarǵa alynady.

«Bul jaǵynan eksporttyq suranys pen ımporttyq múmkinshilikterdi qarap otyrý kerek. Mysyrdan, Pákistannan jáne basqa elderden alyp kelsek, bul qymbat kókónister jalpy baǵanyń kórsetkishterin kóterip turady. Osy oraıda kórshiles eldermen birlese bul problemany sheshýge tyrysatyn bolamyz. Ózbekstanda da kókónis baǵasy edáýir kóterilip otyr. Sonymen qatar, etke suranys bolǵannan keıin, byltyr bizdegi ettiń eksporty edáýir ósti. Bul óz kezeginde ishki naryqta baǵaǵa áserin tıgizetini anyq», - dedi B. Sultanov.

Onyń paıymynsha, bul máselede memlekettik ári jergilikti atqarýshy organdar, bıznes qoǵamdastyq, sondaı-aq fermerler ózara is-qımylda jumys istese, naqty nátıje bolady. Sonda ǵana ónim baǵasy kúrt kóterilmeıdi.