Kartop baǵasyn turaqtandyrý barysynda 49 zań buzýshylyq anyqtalǵan

ASTANA. KAZINFORM — Áleýmettik mańyzy bar azyq-túlik taýarlarynyń baǵasyn turaqtandyrý maqsatynda QR Saýda jáne ıntegratsııa mınıstrligi keshendi jumystar atqaryp jatyr.

картоп
Фото: pixabay.com

Jyl basynan saýda ústemesin 15%-dan asyrmaý boıynsha 20 aımaqtyq komıssııa ótip, olardyń barysynda áleýmettik mańyzy bar ónim sanalatyn kartopqa qatysty 49 zań buzýshylyq anyqtaldy. Anyqtalǵan barlyq faktiler boıynsha tıisti ákimshilik sharalar qabyldanatyn bolady.

– Saýda mınıstrliginiń iri saýda jelilerimen, atap aıtqanda, Small jáne Magnum jelilerimen ótkizilgen kezdesýlerdiń nátıjesinde, búgingi kúni Astanadaǵy Small jelisinde kartoptyń ortasha baǵasy 280 teńgege, al Magnum jelisinde 185 teńgege deıin tómendedi. Saýda komıtetiniń monıtorıngi boıynsha, búgingi kúni Qazaqstan boıynsha kartoptyń ortasha baǵasy 322 teńge. Áleýmettik dúkender men ÁKK seriktesterinde – eldiń barlyq aımaqtarynda kartoptyń kólemi jetkilikti jáne naryqtaǵy baǵadan tómen satylyp jatyr, – dep habarlady vedomstvodan.

Aımaqtardyń turaqtandyrý qorlarynda jınaqtalǵan kartopty satý jalǵasýda. 2024 jylǵy jeltoqsannan 2025 jylǵy 19 qańtarǵa deıin jalpy kólemi 85,4 myń tonnany quraıtyn kartoptyń 23,6 myń tonnasy satyldy. Sońǵy 3 kúnde shamamen 3 myń tonna kartop satyldy, onyń ishinde Almaty qalasynda – 300 tonna, Shymkentte – 600 tonna, Túrkistan oblysynda – 300 tonna jáne t.b. Búgingi kúni turaqtandyrý qorlarynda 62 myń tonna kartop bar.

Atalǵan sharalar ishki naryqtaǵy baǵanyń tómendeýine yqpal etti.

Eske sala keteıik, buǵan deıin QR Aýyl sharýashylyǵy Eginshilik departamentiniń dırektory Nazgúl Hatepova Úkimette kartop baǵasynyń kenetten qymbattaýy jóninde pikir bildirip, aldaǵy aptada turaqty baǵa ornaıdy dep sendirgen bolatyn. 

Сейчас читают