Kartop baǵasyn ósirgenderge aıyppul salyndy

ASTANA. KAZINFORM – Kartopqa saýda ústemesin asyrǵany úshin 505 qaýly shyǵaryldy, onyń 41-ine aıyppul salyndy. Bul týraly Saýda komıteti habarlady. 

— Saýda jáne ıntegratsııa mınıstrligi áleýmettik mańyzy bar azyq-túlik taýarlarynyń baǵasyn turaqtandyrý jáne saýda ústemeleriniń negizsiz ósýine jol bermeý maqsatynda memlekettik baqylaýdy júzege asyrý jáne óńirlik komıssııalarmen ózara is-qımyl jasaýda júıeli jumys júrgizýde. Jyl basynan mınıstrliktiń aýmaqtyq departamentteri 1585 ákimshilik qaýly shyǵardy, onyń 396-sy jalpy somasy 24 mln teńge aıyppul, 1189-y eskertý, — delingen habarlamada.

Ákimshilik quqyq buzýshylyq týraly Kodeksiniń 204-4-babynyń talaptaryn iske asyrý sheńberinde (ÁMAT-qa 15%-dan astam saýda ústemesiniń mólsherin asyrǵany úshin) 1419 qaýly shyǵaryldy, onyń ishinde 18,2 mln teńge somasyna 239 aıyppul salynyp, 1180 eskertý jasaldy.

— Kartop — áleýmettik mańyzy bar taýarlardyń mańyzdy pozıtsııasy. Kartopqa saýda ústemesin asyrǵany úshin 505 qaýly shyǵaryldy, onyń 41—ine aıyppul salyndy. Aıyppul somasy 2,6 mln teńgeden asady. Al 464-ine eskertý jasaldy, — delingen Saýda komıteti habarlamasynda.

Budan basqa, deldaldyq shemalardy tergeý jónindegi óńirlik komıssııalardyń qyzmeti sheńberinde ÁMAT taýarlaryn jetkizý tizbekteri boıynsha jyl basynan beri 303 otyrys ótti.

— Onyń qorytyndysy boıynsha ónimsiz deldaldardyń qatysýynyń 1164 jaǵdaıy jáne saýda ústemeleriniń asyp ketý faktileri anyqtaldy. Osy jumystyń nátıjesinde 1079 ákimshilik qaýly shyǵaryldy, al 85 ónimsiz deldal jetkizý tizbeginen shyǵaryldy. Mınıstrlik saýda salasyndaǵy zańnamanyń saqtalýyna memlekettik baqylaý is-sharalar keshenin iske asyrýdy jalǵastyra beredi, — delingen habarlamada.

Aıta ketelik elde qandaı azyq-túlik pen qyzmet túriniń baǵasy ózgergeni jaıly jazǵan edik.