Kartop baǵasy kóktemde 185 teńgeden aspaıdy

ASTANA. KAZINFORM – Aýyl sharýashylyǵy mınıstrliginiń málimetinshe, bıyl kartop ónimi 2,7 mıllıon tonna bolady dep josparlanyp otyr. 5 qyrkúıekke deıin 840,2 myń tonna kartop jınalǵan.

Egistiktegi baǵalar 90–120 teńge/kg aralyǵynda, al bólshek saýdadaǵy ortasha baǵasy bir aptada 3,9%-ǵa tómendep, 194 teńge boldy. Jalpy jyldyq qajettilik 2 mln tonna. Jaqsy ónim kólemi kútilip otyrǵandyqtan, 28 shildeden bastap kartop eksportyna qoıylǵan shekteý alynyp tastaldy.

Aýyl sharýashylyǵy vıtse-mınıstri Erbol Tasjúrekovtiń aıtýynsha, tamyzda týyndaǵan fıtosanıtarııalyq sertıfıkattardy rásimdeýdegi tehnıkalyq irkilister joıylyp, vedomstvo el ishindegi tapshylyq táýekelderin boldyrmaý úshin eksportty qatań baqylaýda ustaıdy.

Al Saýda jáne ıntegratsııa mınıstrligi baǵany turaqtandyrý úshin Kartop jáne kókónis ósirýshiler odaǵymen memorandým jasasty. Oǵan sáıkes, aýyl sharýashylyǵy óndirýshileri ákimdikterdiń suranysy boıynsha ishki naryqty kókónispen qamtamasyz etedi.

Qarasha aıynda ónimniń satý baǵasy – 145 teńgeden, al 2026 jyldyń kókteminde saqtaý shyǵyndaryn eskere otyryp 185 teńgeden aspaıdy. Sol sııaqty kelisimder «Aral tuz» AQ-men (tuz baǵasyn 100 teńgeden 82 teńgege deıin 18% tómendetý) jáne jumyrtqa óndirýshiler qaýymdastyǵymen (jumyrtqanyń shekti baǵasy – 55 teńge/dana) jasaldy.

Turaqtandyrý qorlaryn tsıfrlyq baqylaý

Úkimettiń baspasóz qyzmeti habarlaǵandaı, áleýmettik mańyzy bar ónimderdiń qorlaryn basqarýda ashyqtyqty qamtamasyz etý maqsatynda Saýda jáne ıntegratsııa mınıstrligi «Qazaqtelekommen» birlesip turaqty monıtorıng algorıtmin ázirledi. Joba úsh kezeńnen turady:

• 1 kezeń – qoıma jáne qorlar derekqoryn qalyptastyrý. Bul baǵytta SQO, Aqmola, Pavlodar, Jetisý jáne Qostanaı oblystarynyń áleýmettik-kásipkerlik korporatsııalary (ÁKK) tıimdi jumys atqaryp jatyr.
• 2 kezeń – qoımalarǵa beınebaqylaý ornatý jáne ony mobıldi qosymsha men taýar qozǵalysyn qadaǵalaý júıesine biriktirý. Bul jumys Pavlodar oblysynda bastaldy.
• 3 kezeń – óndirýshiden tutynýshyǵa deıingi taýar qozǵalysyn baqylaý úshin elektrondyq shot-faktýralar men fıskaldyq derekterdi taldaý.
• Osylaısha, taýarly-materıaldyq qorlar esebinen bastap, taýardy tutynýǵa deıingi búkil protsesti onlaın baqylaýǵa múmkindik beretin tsıfrlyq júıe qurylmaq. Sonymen qatar, ataýly áleýmettik qoldaýǵa kóshý boıynsha túzetýler daıyndaldy. Aqkól qalasynda pılottyq joba iske qosyldy, al Pavlodar men Kókshetaý qalalarynda jobany keńeıtý josparlanyp otyr.

Inflıatsııaǵa áser etetin faktorlardy talqylap, ony tejeý sharalaryn ázirleýge arnalǵan keńes sońynda Serik Jumanǵarın Tabıǵı monopolııalardy retteý komıtetine retteletin qyzmetterdiń baǵasyn ósirmeý boıynsha usynystar ázirleýdi tapsyrdy. Al ákimdikterge ÁKK seriktesteri ıelik etetin kókónis qoımalaryna beınekamera ornatý úshin qoljetimdilikti qamtamasyz etý júkteldi.

Aıta keteıik, kartop, kókónis jáne jemis-jıdek qoımalarynyń syıymdylyǵy ónim kóleminen 4 ese az.