Qartaıý ındeksi boıynsha Soltústik Qazaqstan kósh bastap tur

ASTANA. KAZINFORM — Qazaqstanda halyqtyń qartaıý ındeksi ósip keledi. 2025 jyly elimiz boıynsha kórsetkish 100 balaǵa shaqqanda 32,9 qurady, bir jyl buryn ol 31,1 deńgeıinde bolǵan. Bul 15 jasqa deıingi ár 100 balaǵa 65 jastan asqan 32,9 adamnyń keletinin bildiredi. Bul týraly Ulttyq statıstıka bıýrosy málim etti.

Qalalyq jerde bul ındeks aýyldy jerge qaraǵanda joǵary, tıisinshe 34,9 jáne 29,6.

Óńirler bólinisinde eń tómengi mánder Mańǵystaý oblysynda – 16,2, Túrkistan oblysynda – 17,2 jáne Shymkent qalasynda 17 deńgeıinde tirkelgen.

– Eń joǵary deńgeı Soltústik Qazaqstan – 84,1, Shyǵys Qazaqstan – 80,7 jáne Qostanaı oblystarynda – 71,3 baıqaldy. Sondaı-aq joǵary mánder Pavlodar oblysynda – 60,2 jáne Qaraǵandy oblysynda – 56,6 tirkeldi, – delingen habarlamada.

Almaty qalasynda ındeks 100 balaǵa shaqqanda 38,3 bolsa, Astana qalasynda – 22,9.

Halyqtyń qartaıý ındeksi qart adamdar men balalar sanynyń araqatynasyn kórsetedi. Ol 15 jasqa deıingi ár 100 balaǵa eńbekke qabiletti jastan asqan qansha adamnyń keletinin sıpattaıdy. Tómen mánder halyqtyń jas qurylymynyń jas ekenin, al joǵary mánder qart adamdar úlesiniń basym ekenin bildiredi.

Aıta keteıik, jaqynda Qytaı qartaıýdy báseńdetetin ekpeni synaqtan ótkizdi.