Qartaısa da qaıraty qaıtpaǵan Muhamedolla Aǵzamov qol kúresten álemdi baǵyndyrdy
ÓSKEMEN. QazAqparat – Qol kúresten ardagerler arasynda tórt dúrkin Álem chempıony, 17 dúrkin Azııa chempıony Muhamedolla Aǵzamov bıyl jetpiske tolady. Bala kúninen sportty janyna serik etken ol áli de úzdiksiz jattyǵyp júr. QazAqparat tilshisi búgingi Qarttar kúnine oraı halyqaralyq dárejedegi sport sheberimen suhbat qurǵan bolatyn.
- Týyp-ósken jerińiz jaıly aıtyp ótseńiz.
- 1951 jyly jeltoqsan aıynyń 2-i kúni Shyǵys Qazaqstan oblysy Kókpekti aýdany Órnek aýylynda dúnıe esigin ashtym. Úlgili malshy aýylyndaǵy orta mektepte bilim aldyq. 1967 jyly Almaty qalasynda ornalasqan aýyl sharýashylyǵy ınstıtýtyna oqýǵa túsip, 1972 jyly támámdadym.
- Sportqa degen qyzyǵýshylyǵyńyz qalaı oıandy?
- Mektepte oqyp júrgen kezimde aýylǵa áskerden kelgen jigitter gir men ziltemir ákelip, jattyǵyp júrdi. Soǵan qyzyǵyp, biz de aınalysa bastadyq. Mine, sol ýaqyttan beri 55 jyl ótipti. Jarty ǵasyrdan astam ýaqyt boıy sportpen shuǵyldanyp kelemin. Stýdenttik shaqta erkin kúreske qatysqanym da bar.
- Qol kúresten qandaı jetistikterge qol jetkizdińiz?
- Ardagerler arasynda tórt dúrkin Álem chempıony, 17 dúrkin Azııa chempıony atandym. Ár jarysqa jiti daıyndyqpen attanamyn. Osy jyly 24 qarashada Rýmynııanyń Býharest qalasynda qol kúresten Álem chempıonaty bolady. Qazir soǵan daıyndalyp jatyrmyn. Aptasyna 3 ýaqyt birneshe saǵattan júıeli túrde jattyǵamyn. Buıyrsa, sol jaqtan da jeńispen oralsaq deımiz.
1992 jyly jeltoqsanda Qazaqstanda qol kúres jáne gir sporty federatsııasyn quryp, sony 12 jyl boıy basqardym. Osylaısha, elimizde osy eki sport túriniń negizi qalandy desek te bolady. Búginde Dúnıejúzilik qol kúres federatsııasynyń vıtse-prezıdenti jáne Azııanyń gir federatsııasynyń prezıdentimin. Osydan 3 jyl buryn Shyǵys Qazaqstan oblysyndaǵy sport ardagerleri keńesiniń tóraǵalyǵyna saılandym.
- Osy sport túriniń qıynshylyqtary qandaı?
- Jalpy kez kelgen sporttyń qıynshylyqtary bir birine uqsas bolady. Birinshi kezekte jalqaýlyqty jeńip, janyńdy salyp shuǵyldaný kerek. Úzdiksiz jattyǵyp, zııandy ádetterden aýlaq júrgen jón. Jattyǵý kezinde qur julqyna bermeı, ár qımylyńdy ne úshin istep jatqanyńdy túsinýiń qajet.
- Jasyńyz ulǵaıǵan saıyn sportpen shuǵyldaný aýyrlaı túsetin shyǵar?
- Aldaǵy jeltoqsanda jetpiske tolaıyn dep otyrmyn. Qudaıǵa shúkir, ázirge esh kedergisiz sportpen aınalysyp kelemiz. Bir aptada 7-8 saǵattaı jattyǵý jasap, gir kóteremin. Eseptesem, bir jattyǵýda jalpy 10-15 tonna temir kóteredi ekenmin. Qandaı da bir nátıje bolý úshin osylaı eńbektený shart. Tek qıyndyqtardy eńserip qana bıik shyńdardy baǵyndyrýǵa bolady.
- Qandaı da bir dıeta ustaısyz ba?
- Joq. Kóńilim qalaǵan tamaqty jeı beremin. Toı-tomalaqta, qonaqqa barǵanda jaınap turatyn dastarhandaǵy túrli taǵamnan shekteýsiz dám tatamyn.
- Otbasyńyz jaıly aıtyp berseńiz.
- 3 balamnan kúnnen ystyq, mamyqtan jumsaq kóretin 5 nemerem bar. 2008 jyly qaıtys bolǵan úlken ulym Berik ziltemir kóterýden Qazaqstan chempıony bolǵan. Al qyzym men kishi ulym qazir Óskemende jeke kásippen aınalysady.
- Áńgimeńizge kóp rahmet!
