Qartaıǵan ata-ana balasynan alıment óndire ala ma - zańger keńesi
NUR-SULTAN. QazAqparat - Kámelet jasyna tolǵan baladan alıment óndirýge bola ma? QazAqparat osy máselege qatysty zańgerdiń jaýabyn usynady.
Qyzylorda oblysynan habarlasqan oqyrman 5 jyl buryn áıelimen ajyrasqanyn jáne áıelinde qalǵan balasyna alıment tólep júrgenin aıtty.
«Keıin balam kámelet jasyna tolyp, jumys istep júrgen jaǵdaıda oǵan tólep kelgen alımentti óndirip ala alam ba? Óndirip alýdyń sharttary qandaı? », - dep suraıdy oqyrman.
Oqyrman suraǵyna «AR Legal Expert» zań kompanııasynyń zańgeri Aqnıet Muqanov jaýap berdi.
«Eger suraq qoıǵan azamat balasyna alıment tólep júrgen bolsa, keıin qajet bolǵan jaǵdaıda balasynan alıment talap ete alady. Alıment talap etýge zeınet jasyna jetý nemese jazataıym oqıǵadan jumysqa qabiletsiz bolyp qalý jáne basqa da jaǵdaılar sebep bolýy múmkin. Ákesi «Osynsha mólsherde qarajat aýdaryp turýy kerek» dep talap qoıǵan kezde sot onyń balasynyń materıaldyq jaǵdaıyn, jalaqysyn eskere otyryp sheshim qabyldaıdy. Mysaly, shartty túrde alyp qaraǵanda balasynyń jalaqysy 100 myń teńge bolsa, onyń 10-20 myń teńgesin ákesine berip otyrýy kerek bolady. Osyndaı jaǵdaıdyń bolýy múmkin ekenin biletin keıbir ana bolashaqta balasyn ákesi mazalamas úshin burynǵy jubaıynan alıment talap etpeıtin jaǵdaılar da praktıkamyzda kezdesip jatady», - deıdi zańger.
